Governu inaugura ponte Baer iha distritu Kovalima
Ministru Obras Públika, Gastão de Sousa iha kinta-feira loron 8 Fulan Novembru 2012 akompaña hosi Vise Presidente Parlamentu Nasionál, Adriano do Nascimento, inaugura ponte Baer, ho nia naruk metru 120 no luan metru 8 iha sub-distritu Fohorém, distritu Kovalima.
Gastão de Sousa iha ninia intervensaun esplika katak, ho serimónia ida ne’e Governu liuhosi Ministériu Obras Públika hatudu duni ninia kompromisu ne’ebé hakarak atinji Planu Estratéjiku Dezenvolvimentu 2011-2030, ita hakat tan pasu ida ba oin hodi hadi’a Infraestratura iha ita nia rai, hahú ohin ba oin, imi hotu sei sai sasin ba eventu importante sira ne’ e hotu, tanba iha tempu badak nia laran Governu sei inaugura tan ponte lubuk ida, tanba povu nia moris depende ba infraestrutura ho kondisaun ne’ebé di’ak. Ha’u mós hakarak garanti ba ita-boot sira hotu katak ponte Baer ne’ebé hamriik metin daudaun iha distritu Kovalima ne’e, ninia konstrusaun tuir duni padraun internasionál”, tenik Ministru Obras Públika. 
Administradór Adjuntu distritu Kovalima, Filipe Vieira Cardoso, hatete katak, lori povu Kovalima tomak nia naran fó obrigadu no onra boot ba atensaun espesiál Governu nian, liuhosi projetu konstrusaun ponte Baer. Rezultadu ne’ebé ohin ita iha sai orgullu boot ba povu Kovalima liu-liu komunidade parte sub-distritu Tilomar no sub-distritu Fohorém.
Marka prezensa iha serimónia inaugurasaun ne’e Ministru Obras Públika, Gastão de Sousa, Vise Prezidente Parlamentu Nasionál, Adriano do Nascimento, Sekretáriu Estadu ba Politíka Profisionál no Empregu, Ilídio Ximenes da Costa, membru Parlamentu Komisaun E, diretór no xefe departamentu sira, reprezentante husi Embaixada Indonézia, autoridade lokál distritu Kovalima, emprezáriu no komunidade sira.
