Ministériu Obras Públikas no Ministériu Transporte no Telekomunikasaun, organiza konferensia nasional kona-ba infraestrutura iha loron 29 fulan Outubru tinan 2012, iha Sentru Konvensaun Díli.

Ministru Obras Públikas, Gastão Sousa, iha nia diskursu hatete katak “Eventu ida ohin hanesan pasu importante ba Ministériu Obras Publika no Ministériu Transporte no Telekomunikasaun atu bele fahe informasaun ba parseirus dezenvolvimentu kona-ba planu ministériu ida ne’e ninian ho objetivu hirak ne’ebé maka hakarak atinji tuir programa Governu Konstitusionál iha tinan lima nia laran 2012 – 2017. Hodi nune’e bele transforma programa ne’ebé di’ak ba asaun konkretu atu nune’e bele ajuda dezenvolvimentune’ebé ho kualidade iha nasaun Timor-Leste”.

“Ami mós sei esplika didiak saida maka ami nia planu ba ita-bot sira liu hosi Konferensia ne’e ba ita-bot sira hotu hodi nune’e ita-bot sira bele hatene di’ak liu no iha hanoin ida ne’ebé klaru teb-tebes, saida maka ami atu halo’o iha tinan lima oin mai” Ami mós husu ita-bot sira nian sujestaun atu bele hadiak liu tan ami nia planu”.

Iha biban ne’e mós, Vice Ministru Transporte no Telekomunikasaun,  Flávio  Cardoso  Neves,  aprezenta ba partisipante sira katak “durante tinan lima nia laran iha programa importante tolu mak sei implementa, hanesan iha área portu maritimu, airoportu no telekomunikasaun, tanba área tolu ne’e nu’udar odamatan ekonomia nasionál no internasional iha dezenvolvimentu Timor-Lesten nian”.

Marka prezensa iha konferensia ne’e Vise Primeiru-Ministru, Fernando La Sama de Araújo, Ministru Obras Públikas, Gastão Sousa,  Vise Ministru Transporte no Telekomunikasaun, Flávio  Cardoso Neves, korpus diplomatiku, Embaixadór Portugal, Embaixadór Japaun iha Timor-Leste, reprezentante parseiru dezenvolvimentu, sosiedade sivil, setór privadu, ajensia multilaterais ho bilaterais maka hanesan Banku Mundial, JICA, AUSAID, ADB no sira seluk tan.