Primeiru-Ministru, Kay-Rala Xanana Gusmão, partisipa iha Edisaun V “Bali Democracy Forum”, ne’ebé sei hala’o iha Nusa Dua, Bali, iha loron 8 fulan Novembru tinan 2012.
Xefe Governu Timor-Leste nu’udar konvidadu internasionál ba eventu internasionál ne’e dezde ninia edisaun dahuluk iha tinan 2008.
Objetivu iha sorumutu ida ne’ebé elabora husi Prezidente Indonézia nian Susilo Bambang Yudhoyono atu halibur líder sira iha rejiaun Ázia Pasífiku hodi debate no reflete kona-ba kooperasaun polítika no promosaun prinsípiu demokrátiku iha rejiaun.
Tinan-tinan, forum ne’e sai importante liután no aumenta númeru husi partisipante sira, inklui partisipasaun husi xefe Estadu sira no mós observadór sira husi Europa, Amérika no Áfrika.
Iha edisaun dalimak “Bali Democracy Forum” ne’e, prevee ba partisipasaun hosi reprezentante nasaun73, inklui xefe Estadu 12 no ministru 27.
Husi Bali, Primeiru-Ministru, Kay-Rala Xanana Gusmão liu bá iha Haiti, atu halo vizita ofisiál no atende sorumutu ministeriál g7+ nian ida.