Estadu Timor-Leste kondekora Komandante sira UNPOL no ISF nian ho Kondekorasaun Orden Timor-Leste nu’udar aktu ida ne’ebé simboliza atividade operasionál UNMIT nian hotu ona iha Timor-Leste. Serimónia ida ne’e hala’o iha Palásiu Governu, Díli, iha loron 31 fulan Outubru tinan 2012.

Primeiru-Ministru, Kay Rala Xanana Gusmão, iha ninia diskursu hateten, “Konstrusaun Estadu ida, liu-liu bainhira hahú, hafoin liu tiha konflitu ida, hanesan konsekuénsia hosi luta naruk ida ba libertasaun nian, ne’e prosesu ida ne’ebé maka la sees hosi sala, hanesan mós, iha fatin hotu-hotu,  la iha fatin ida mak bele ezije katak prosesu sira  hanesan ne’e  sei hotu iha tempu badak nia laran”.

Xanana Gusmão mós refere katak “ohin (loron 31 fulan Outubru tinan 2012) harii ona marku boot ba istória daudauk nian maibé boot tebe –tebes ba ita-nia rain. Ne’e hanesan ksolok no orgullu ba timoroan tomak, la’ós tanba polísia no militár sira ne’ebé maka ho laran-luak prontu atubele mai ajuda de’it ita no sira atu husik daudaun Timor-Leste. Molok ne’e motivu ida maka ksolok tanba, ho ajuda ne’e rasik, ita bele korrije ita-nia salan sira no hadi’a ita-nia kapasidade téknika no profisionál”.

Primeiru-Ministru mós hato’o agradesimentu ba komandante sira UNPOL no ISF nian ba serbisu sira ne’ebé sira hala’o iha ne’e. Nasoens Unidas, nu’udar Reprezentante Espesiál Sekretáriu Jerál nian, Governu sira Austrália, Nova Zelándia, Malazia no Portugál, ida tanba bele fó asisténsia ne’ebé mak agora atu termina ona.

Prezidente Repúblika, Taur Matan Ruak husu instituisaun sira defeza no seguransa Timor-Leste nian atubele prontu simu  responsabilidade aas ne’ebé maka país husu ba sira, hodi serbisu ho dedikasaun, rigór no dixiplina no responde ho pozitivu ba konfiansa no espetativa ne’ebé maka sidadaun sira rai hela ba F-FDTL no PNTL.

Iha sorin seluk, Reprezentante Espesiál Sekretáriu Jerál Nasoens Unidas nian, Finn Rieske Nielsen hatete katak PNTL hatudu ona ninia kapasidade atubele garante seguransa iha rai-laran.