Sorumutu Konsellu Ministru loron 24 fulan Outubru tinan 2012
Prezidénsia Konsellu Ministrus
V Governu Konstitusionál
-----------------------------------------------------------------------------------------------------
Díli, loron 24 fulan Outubru tinan 2012
Komunikadu Imprensa
Sorumutu Konsellu Ministru iha loron 24 fulan Outubru tinan 2012
Governu Konstitusionál V hala’o sorumutu iha loron Kuarta ida ne’e, loron 24 fulan Outubru tinan 2012, iha sala Sorumutu Konsellu Ministru nian, iha Palásiu Governu, iha Dili, no halo aprovasaun ba:
1. Dekretu-Lei ne’ebé estabelese períodu promosaun estraordinária ida iha Polísia Nasionál Timor-Leste (PNTL)
Ho aprovasaun rejime promosaun nian iha tinan 2009, PNTL sofre ona transformasaun boot ida kona-ba estrutura irárkika. Maske nune’e sei iha nesesidade atu aumenta númeru vaga nian iha postu balun, no mós, atu halo prosesu kona-ba promosaun foun balun, tanba ne’e mak kria períodu estraordináriu ida.
2. Programa Nasionál ba Dezenvolvimentu Suku
Programa Nasionál ba Dezenvolvimentu Suku (PNDS) sira, ne’ebé lansa iha fulan Juñu liubá, prevee apoiu finanseiru no tékniku ba implementasaun prioridade nasionál sira iha suku sira, durante tinan 8 (husi 2013 ba 2020).
Ba ida ne’e prevee mós sistema ida kona-ba atendimentu no monitorizasaun ba keixa no ninia rezolusaun, atubele garante katak komunidade sira hetan benefísiu ne’ebé di’ak husi programa ne’e.
Atu fó hanoin fila-fali de’it katak programa ne’e hahú iha fulan Janeiru tinan ida ne’e nian, iha momentu ne’ebé halo aprovasaun ba polítika jerál sira kona-ba estabelesimentu Mekanizmu Nasionál atu Aselera Dezenvolvimentu Komunitáriu, liuliu iha konstrusaun, reabilitasaun no manutensaun ba infraestrutura bázika hirak ne’ebé fó benefísiu no hadi’a kualidade moris populasaun sira ne’ebé hela iha suku sira. Rezolusaun Governu nian ne’ebé aprova mekanizmu ida ne’e define mós konstituisaun Grupu Traballu Tékniku no Komisaun Koordenasaun Interministeriál atu define modelu jestaun rekursu umanu ba utilizaun ida ne’ebé sustentada ba rekursu sira Governu nian no funsionáriu públiku sira, ne’ebé agora hetan aprovasaun.
3. Rezolusaun Governu nian ne’ebé aprova disolusaun Konsellu Administrasaun Servisu Autónomu Medikamentu no Ekipamentu Saúde
Haree ba iregularidade grave hirak ne’ebé hetan iha auditoria sira ne’ebé halo ona, ba knaar Konsellu Administrasaun Servisu Autónomu Medikamentu no Ekipamnetu Saúde nian (SAMES E.P.), ne’ebé funsiona ona durante tinan rua, Konsellu Ministru hakotu , tuir lei, disolve Konsellu Administrasaun atuál no kria Komisaun temporária ida atu asegura funsionamentu SAMES E.P., nian ne’ebé kompostu husi membru sira tuir mai ne’e : Odete Belo (Prezidente), Domingos Babo (vogál), Narciso Fernandes (vogál), Santana Martins (vogál), Luís Amaral (vogál) no Emília Mendonça (vogál).
Konsellu Ministru halo mós análize ba :
1. Aprezentasaun Planu Mestre kona-ba Saneamentu no Drenajen Dili nian
Ministru Obras Públikas nian aprezenta ona ohin, ba Konsellu Ministru, relatóriu finál kona-ba “Planu Mestre kona-ba Saneamentu no Drenajen Dili nian (PMSDD) tinan2013 – 2025”.
Relatóriu ne’e, prepara husi grupu peritu internasionál ida ne’ebé kompmostu husi reprezentante sira husi empreza boot rua iha área bee nian husi Melbourne (Melbourne Water no Yarra Valley Water) no peritu sira seluk husi área indústria bee nian ho esperiénsia internasionál, ne’ebé enkomenda tiha ona husi Konsellu Ministru iha fulan Outubru tinan 2010.
Relatóriu husi PMSDD ne’ebé ohin hetan aprovasaun bazeia tomak ba análiza no peskiza estensiva no reprezenta Estratéjia Investimentu no Implementasaun kompreensivu ida atu hadi’a Saneamentu no drenajen ba Dili, ne’ebé sei planeia neneik ba prazu badak , prazu médiu no prazu naruk.
Aprovasaun ba Planu Mestre husi Konsellu Ministru sei loke dalan ba alokasaun, iha tinan 2013, dolar (USD) millaun 5, orsamentu ne’ebé rekomenda husi PMSDD ba tinan dahuluk atu realiza programa ne’ebé prevee atu hamenus bee sa’e to’o 75% no fornese servisu saneamentu kompriensivu ba hela-fatin besik 43.000, to’o iha tinan 2025.
Konsellu Ministru foti mós konkluzaun kona-ba nesesidade husi Grupu Traballu Governamentál ida atu koordena rekrutamentu no jestaun asisténsia téknika ne’ebé presiza atu apoia ba iha estabelesimentu no implementasaun PMSDD nian, iha tempu besik.
2. Aprezentasaun kona-ba g7+ no New Deal
Dezenvolvimentu servisu g7+ no pontu situasaun kona-ba implementasaun New Deal (Akordu Foun) aprezenta ona ba iha Konsellu Ministru husi Ministra Finansa, kuaze semana ida molok Sorumutu Daruak Painel Nivel Aas kona-ba Ajenda Dezenvolvimentu Pós 2015 ne’ebé sei halo iha Londres, iha loron 1 no 2 fulan Novembru nian.
Ministra Finansa, atuál Prezidente g7+ ne’ebé sai mós hanesan elementu ida husi Painél ne’ebé servisu hela ba iha Ajenda Dezenvolvimetu Nasoens Unidas Pós 2015 – ne’ebé g7+ hakarak garante atu bele adekua ho nesesidade nasaun frájil sira nian – esplika ba Konsellu Ministru kona-ba oinsá oras ne’e daudaun implementa New Deal iha Timor-Leste.
3. Aprezentasaun kona-ba prosesu Promosaun estraordinária ba iha Polísia Nasionál Timor-Leste (PNTL)
Reestruturasan PNTL nian no prosesu promosaun nian ne’ebé halo ona husikedas tinan 2009 hetan esplikasaun husi Sekretáriu Estadu Seguransa no husi Prezidente Komisaun Estraordinária Promosaun nian. Aprezentasaun ne’e espesifika liu kona-ba planu rekrutamentu no promosaun foun nian.
4. Aprezentasaun Auditoria ba Aprovizionamentu
Ministériu Finansa informa ba Konsellu Ministru kona-ba prosesu auditoria no ninia mekanizmu sira, ne’ebé realiza ba órgaun públiku sira, iha Timor-Leste.
5. Pontu Situasaun kona-ba preparativu kona-ba Komemorasaun Nasionál sira iha fulan Novembru
Komisaun Nasionál Organizadora Ba Aniversáriu Proklamasaun Independénsia RDTL da-37 no Tinan atus ida Revolusaun Manufahi no rekoñesimentu ba Don Boaventura halo pontu situasaun ida kona-ba preparasaun komemorasaun sira ne’ebé sei hala’o husi loron 25 to’o 30 fulan Novembru.
Aleinde ne’e halo mós análize ba preparativu ne’ebé la’o hela ba selebrasaun “Tinan 20 Misaun Pás iha Timor – Lusitânia Expresso” no loron 12 fulan Novembru (Loron Naisonál ba Juventude, loron ne’ebé akontese masakre Santa Krús).
