Toleránsia Pontu iha loron 31 fulan Outubru tinan 2012, iha oras loro-kraik nian
Prezidénsia Konsellu Ministrus
V Governu Konstitusionál
-----------------------------------------------------------------------------------------------------
Díli, loron 30 fulan Outubru tinan 2012
Komunikadu Imprensa
Toleránsia Pontu iha loron 31 fulan Outubru tinan 2012, iha oras loro-kraik nian
Governu Konstitusionál V Timor-Leste nian deside atuhodi fó toleránsia pontu iha loron 31 fulan Outubru tinan 2012, loron-kuarta, iha oras loro-kraik nian, ba funsionáriu no ajente ministériu hotu-hotu ka servisu ne’ebé dependente ba sira, nomós institutu no organizmu sira ne’ebé integra iha administrasaun indireta Estadu nian.
Desizaun ida ne’e bazeia ba Lei n.o 10/2005, loron 10 fulan Agostu, ne’ebé determina loron ne’ebé mak feriadu nasionál, data komemorativa no toleránsia pontu nian. Entre feriadu nasionál sira ne’ebé nia loron fiksa ona, mak loron 1 fulan Novembru, nu’udar Loron Santu Hotu-hotu sira-nian no loron 2 fulan Novembru, nu’udar Loron matebian sira nian.
Loron Santu sira-nian korresponde, iha liturjia kristaun, ba festa ne’ebé selebra atuhodi fó onra ba Santu Hotu-hotu no mártir sira ne’ebé koñesidu ka lae – Festum omnium sanctorum – ne’ebé mak Igreja Katólika selebra iha loron 1 fulan Novembru, tuir kedán Loron Matebian sira nian, monu iha loron 2 fulan Novembru.
Iha tinan ida ne’e, loron sira ne’e monu iha loron-kinta no loron-sesta ida, ne’ebé maka sei difikulta funsionáriu administrasaun públika sira-nia maka fila ba distritu sira, ne’ebé sira-nia matebian deskansa ba, atubele hala’o omenajen, no komemora Loron Santu sira-nian. Ida ne’e maka halo Governu hanoin atuhodi fó toleránsia pontu iha loron-kuarta, iha oras loro-kraik nian.
