Papél komunikasaun sosiál iha prosesu dezenvolvimentu Timor-Leste
Sekretáriu Estadu Komunikasaun Sosiál, Nélio Isaac Sarmento, partisipa nuudar oradór iha semináriu ho tópiku “Perspetiva Governu Konstitusionál V, ba Dezenvolvimentu Komunikasaun Sosiál iha Timor-Leste” ne’ebé organiza hosi Departamentu Komunikasaun Sosiál, Fakuldade Siénsia Sosiál no Polítika, Universidade Nasionál Timor Lorosae (UNTL), iha tersa-feira, loron 23 fulan Outubru 2012.
Objetivu hosi semináriu ida ne’e atu fahe informasaun kona-ba planu Governu Konstitusionál V nian iha área komunikasaun sosiál nian iha Timor-Leste no mós perspetiva Governu ba ezisténsia komunikasaun sosiál iha Timor-Leste hodi garante liberdade espresaun.
Nélio Isaac Sarmento, iha ninia aprezentasaun hateten, katak, “komunikasaun sosiál ho Governu sai hanesan parseiru, maibé komunikasaun sosiál iha obrigasaun atu krítika Governu hanesan parte ida atu garante liberdade espresaun ninian. Governu mós iha obrigasaun atu fahe informasaun ba iha komunikasaun sosiál, nune komunikasaun sosiál bele desimina informasaun nee ba povu, komunikasaun sosiál mós presiza Governu atu hetan informasaun, instituisaun rua ne’e la ses malu. Tanba ne’e planu iha tinan oin mai Governu sei foti komunikasaun sosiál hanesan parseiru ne’ebé importante ba informasaun, liuliu atu garante públiku iha asesu ba informasaun kona-ba lalaok dezenvolvimentu nian”.
“Haree ba importansia hosi papel komunikasaun sosiál nian hodi kontribui iha prosesu dezenvolvimentu, Governu sei fó apoiu ba seitór komunikasaun sosiál públiku no privadu atu hasa’e sira nia reskursu liu hosi formasaun profésionál iha área komunikasaun ninian, bolsa estudu ba jornalista sira no fó insentivu ba sira nia instituisaun atu bele sai profesionál liután”, hatutan Sekretáriu Estadu.
Iha fatin hanesan Reitór UNTL Aurélio Guterres, hateten “ho estabelesimentu Gabinete Sekretáriu Estadu Komunikasaun Sosiál, iha Prezidénsia Konsellu Ministru nian, bele mós fó apoiu ba iha Departamentu Komunikasaun Sosiál, apoiu sira ne’e la’ós d’eit aspetu tékniku no mós kona-ba formasaun kontinua maibé loke odamatan oinsá ami nia estudante finalista sira bele halo prátika ka estudu komparativu sira, iha nivél nasionál, hein katak ho kooperasaun sira ne’e bele fortifika relasaun entre UNTL ho instituisaun Governu”.
