FALINTIL-Forsa Defeza Timor-Leste hosi Komponente Navál no Forsa Mariña Estadus Unidus Amerika nian, hala’o “Exersísiu Lafaek” hahú hosi loron 9-16, fulan Outubru, tinan 2012, termina iha Tasi-Tolu, Díli, Timor-Leste.

Objetivu hosi exersísiu hamutuk ne’e atu transfere espesialidade forsa mariña Estadus Unidus Amerika nian ba komponente navál, atu nune’e bele hasa’e kapasidade membru navál nian, hodi partisipa iha kualkér operasaun militár iha futuru.

Xefe Estadu Maijór Jenerál F-FDTL, Lere Anan Timur, iha nia diskursu bainhira enserra “Exersísiu Lafaek” ne’e hateten katak, dala ida tán ita halibur malu iha ne’e atu enserra “Exersísiu Lafaek” tinan 2012,  exersísiu ida ne’e atu hametin ita-nia relasaun, bilaterál entre Estadus Unidus Amerika no Timor-Leste. “Loron hirak ne’e nia laran Forsa Mariña Estadus Unidus Amerika transfere sira nia esperiénsia prátika barak ba Forsa Defeza Timor-Leste  liuhosi individuál hosi nivél seksaun ba nivél pelotaun no mós pratika hosi kombate urbana ninian, la’ós ne’e de’it maibé mós esperiénsia liuliu iha kadeia komandu nian. Aleinde ne’e nu’udar militar ita mós transfere esperiénsia kona-ba sentru korpu militár ninian ba Forsa Mariña Estadus Unidus Amerika nian, exersísiu ida ne’e, la’ós exersísiu ikus nian, maibé ita sei kontinua hala’o nafatin iha tinan seluk mai.

Iha fatin hanesan, Embaixadora Estadus Unidus Amerika, iha Timor-Leste, Judith Fergin informa katak, ohin loron parseria entre Forsa Estadus Unidus Amerika ho Forsa Defeza Timor-Leste metin liután, tanba liuhosi exersísiu Lafaek ne’e bele hametin relasaun hodi hadia seguransa rejionál nian no ida ne’e bele hametin pesoál militár nasaun amigu sira seluk.

“Ho “Exersísiu Lafaek” ne’e, hasa’e ona ita nia militár sira nia kapasidade atu haree ba asisténsia umanitáriu, atividade dezastre nian  no aumenta ita-nia kapasidade iha  forsa konjuntu  hodi fó benefisiu ba Timor-Leste ka rejiaun no liuliu Timor-Leste kontinua involve an iha manutensaun ba pás nian no sai mós benefisiu ba mundu”, tenik Embaixadora Estadus Unidus Amerika.

Marka prezensa iha serimonia enseramentu “Exersísiu Lafaek tinan 2012” ne’e, Sekretariu Estadu Defeza, Júlio Tomás Pinto; Embaixadora Estadus Unidus Amerika iha Timor-Leste, Judith Fergin; Xefe Estadu Maijór Jenerál F-FDTL, Lere Anan Timur; Xefe Estadu Maijór F-FDTL Koronél Falur Rate Laek; no Koronél Forsa Mariña Estadus Unidus Amerika, Scott Campbell.