Vise Primeiru-Ministru, Fernando La Sama de Araújo reprezenta Governu Konstitusionál dalimak iha inaugurasaun Kámara Ekleziástiku Diocese Díli nian, iha kinta-feira, loron 11 fulan Outubru tinan 2012.

“Ita hothotu haksolok tanba iha ona kámara eklezeástiku ida iha diocese Dili nian. Inaugurasaun ida ohin halo ita hanoin fali mós uma antigu ne’ebé ita lakon buat hotu-hotu, dadus barak, servisu barak tinan ba tinan kuaze dadus barak ita lakon hotu. maibé ha’u konsidera katak inaugurasaun ida ohin nuudar aktu rekoperasaun nasionál ida. Ita nia sentimentu trise sira ne’e laiha ona, hanesan mós edifisiu tuan ita troka ona ho ida foun”, hateten Fernando La Sama de Araújo

Fernando La Sama de Araújo, hatutan, “Ha’u agradese ba Igreja nia dedikasaun iha tinan barak nia laran, reafirma duni ninia importánsia iha Timor-Leste. “Igreja mak besik liu ho povu no Governu respeita ida ne’e, no hatene duni relasaun igreja nian ho povu. Tan ne’e ha’u konsidera importante atu halo parseria entre Igreja Katólika no Governu, atu dezenvolve povu ida ne’e ba oin no nasaun ida ne’e ba oin, tanba ne’e  ha’u iha optimizmu tebe-tebes katak la’o hamutuk entre igreja katólika ho Governu ita sei fó solusaun di’ak, garante futuru ida prósperu ba povu Timor-Leste”, hatutan Vise Primeiru-Ministru

Iha fatin hanesan Bispu Dioseze Dili, Dom Alberto Ricardo da Silva, hateten, “Funsionamentu Kámara eklezestiáka ne’e, bele hala’o ona atividade sira hotu dioseze nian, hanesan halo konservasaun ba dokumentu sira”.

Marka Prezensa iha serimónia inaugurasaun ne’e, Vise Primeiru-Ministru, Fernando La Sama de Araújo, Vise Prezidente Parlamentu Nasionál, Aderito Hugo da Costa, Bispu Dioseze Dili, Dom Alberto Ricardo da Silva no Padre no Madre sira.