Ministru Komérsiu, Indústria no Ambiente, António da Conceição, hala’o semináriu ba dahuluk, ho tema ’”Papél Kooperativa no Dezenvolvimentu Ekonómiku Nasionál Timor-Leste nian”, hodi komemora Loron Internasionál ba Kooperativa iha Timor-Leste, hahú hosi loron, 15 to’o 16 fulan Outubru, tinan 2012, iha Sentru Kovensaun Díli.

António da Conceição iha diskursu informa katak “iha programa Governu Konstitusional  V fó prioridade ba setór kooperativa, tanba setór ne’e sai hanesan pilár ida ne’ebé importante tebes atu bele jere auto empregu ba juventude feto sira, liu-liu populasaun iha área rurál sira, tanba atividade kooperativa ne’e maka bele sai hanesan meiu ida ne’ebé populasaun sira hotu bele reuni iha ne’e atu bele halibur sira nia rekursu hamutuk”.

“Governu ida ne’e mós dispoin ona rekursu finanseiru atu bele intensiva kooperativa sira ne’e ninia dezenvolvimentu rasik, hodi bele fasilita kapasitasaun rekursu umanu membru kooperativa sira nian, nune’e sira bele hala’o knaar hanesan lider ba kooperativa sira ninian, liu-liu atu halo administrasaun no jestaun ba grupu kooperativa nian”, tenik Ministru.

Marka prezensa iha eventu ne’e, Vise Primeiru-Ministru, Fernando La Sama de Araújo; Ministru Komérsiu, Industria no Ambiente, António da Conceição; Prezidente Funsaun Publika, Liboriu Pereira; Vise Ministru Komérsiu, Industria no Ambiente, Abel da Costa Ximenes; Sekretáriu Estadu Komérsiu, Ricardo Cardoso Nheu; Sekretariu Estadu Industria no Kooperativa, Filipus Pereira, no Grupu Kooperativa hosi distritu sanulu resin tolu.