Vise Primeiru-Ministru, Fernando La Sama de Araujo akompaña hosi Sekretáriu Estadu ba Polítika Formasaun Profisionál no Empregu (SEPFOPE), Ilidio Ximenes da Costa, Sekretária Estadu Setór Privadu, Veneranda Lemos, Sekretáriu Estadu Peskas, Rafael Pereira Gonçalves, iha loron 8 fulan Outubru, iha Sentru Formasaun Tibar, ofisialmente halo abertura ba formasaun iha área marítima indústria ho benefisiáriu sira hamutuk 15.

Benefisiáriu sira ne’e kompostu hosi mane hamutuk 14 no feto nain 1 sei tuir formasaun ho durasaun fulan 3, ne’ebé fulan 2 tuir formasaun iha Sentru Nasionál Empregu Formasaun profisionál Tibar no fulan 1 sei ba kompleta formasaun Iha indonézia.

Iha serimónia abertura Vise Primeiru-Ministru, Fernando La Sama de Araújo hato’o “Ita agora atu halo hela dezenvolvimentu boot konstrusaun rua iha parte sul, iha Covalima, Vikeke no ita-nia rai foho ne’ebé maka karik kontentór boboot sira ita labele lori hosi Covalima liuhosi Ainaro, Aileu, mai Dili, ita presiza via marítma. Karik aban bainrua la’ós ona ró nakroman, ita presiza mós iha ferry balun atu bele liga Dili ho parte norte ka sul, presiza produtu agríkula sira iha ne’ebá atu mai iha DIli, ita la’ós lori ona hosi  rai-maran hosi Covalima, Ainaro, Aileu ka hosi Ossu, Vikeke mai iha Baukau, Manatutu maibé ita presiza liuhosi tasi, ne’e ba interese nivel nasionál nian”.

“Maibé ha’u hakarak hateten ba imi nain 15 katak ohin imi sei presiza treinu aban bainrua tinan lima ka  neen tan mai, imi ne’ebé formandu tenke fó formasaun, sai formadór, maibé imi ne’ebé hetan formasaun tenke sai formadór iha futuru no atu ko’alia kona-ba soberania, ita hotu-hotu hola parte iha ne’ebá, servisu ne’ebé mak ita fahe malu, ita presiza irárkia ida, maibé ita hotu-hotu presiza iha responsabilidade ba ita-nia nasaun”, apela Vise Primeiru-Ministru.

Ilídio Ximenes da Costa informa mós katak knaar ida boot mak hosi SEPFOPE nian iha Governu V atu hahú halo promosaun liuliu ba sentru sira ne’e, atu nune’e ita nia juventude sira bele hahú loke sira nia hanoin, atu hili saida maka sira hakarak ba iha futuru. Tanba ida ne’e maka SEPFOPE haree katak maske uitoan, haree liu ba sira nain hira ne’ebé tuir formasaun, maibé  iha oin mai sei hahú kontinua halo promosaun ne’ebé maka di’ak liután atu ita bele koopera no bele eleva ita-nia alin sira ninia aprendizajen, no mós kapasidade iha área marítima nian.

Formasaun iha área maríitma ne’e hetan apoiu hosi Governu alemaña liuhosi GTZ, no durante formasaun sei uza ró Nakroma.