Sekretária Estadu ba Apoiu no Promosaun Setór Privadu (SEAPSP), Veneranda Lemos, inaugura Maurusa Grupu Sentru Bambu, iha aldeia Maurusa, suku Malere, distritu Aileu, kinta-feira, iha loron 11 fulan Outubru tinan 2012.

“Governu liuhosi Sekretária Estadu ba Apoiu no Promosaun Setór Privadu tau importánsia atu dezenvolve liután Sentru Bambu hodi sai nu’udar fonte produsaun ba produtu ne’ebé halo hosi Au, importante mós atu subliña katak Au maka sai matéria prima ne’ebé bele dezenvolve ka eleva liután ekonomia komunidade iha área rurál. Ita hein katak ho servisu hamutuk ida ne’e, komunidade ho Governu, liuhosi sentru bambu, ita hahú daudauk ona implementa planu ne’ebé maka Governu hakarak atu halo iha governasaun V atu hametin no haforsa setór privadu”, hateten Sekretária Estadu, Veneranda Lemos.

Veneranda Lemos, esplika tan katak, iha futuru sentru bambu sei transforma ba empreza públika atu bele garante sustentabilidade, viabilidade no kontribui ba bein estar populasaun no hasa’e kresimentu ekonómiku iha área rurál no iha tinan ida ne’e nia laran ita sei lansa kampaña nasionál ba plantasaun Au, atu habelar, hasa’e, no hametin koñesimentu populasaun Timor-Leste tomak tanba hetan benefísiu hosi kuda Au.

Marka prezensa iha serimónia ne’e maka Sekretária Estadu ba Apoiu no Promosaun Setór Privadu, Veneranda Lemos; Sekretáriu Estadu Konsellu Ministru, Avelino Coelho, Xefe Suku Malere, Jacinto Dias no komunidade iha aldeia Maurusa tomak.