Ministériu Solidariedade Sosiál, iha, liuhusi Departamentu Harií  Pás no Koezaun Sosiál, servisu hamutuk ho Programa Nasoins Unidas ba Dezenvolvimentu (PNUD), lansa fundus ki’ik ba ONG lokál hamutuk 10 ho objetivu atu hala’o programa kona-ba prevensaun konflitu, Harií Pás no Koezaun Sosiál iha Timor-Leste, ne’ebé hala’o iha tersa-feira, loron, 9 fulan Outubru 2012, iha salaun MSS, Kaikoli-Dili

Vise Ministru Solidariedade, Jacinto Rigoberto Gomes de Deus, hateten, kona-ba programa harii pás no koezaun sosiál ho esperiénsia katak, tinan lima liubá iha eleisaun 2007, hamosu konflitu boot iha Timor-Leste, ho ida ne’e hamosu kooperasaun MSS ho UNDP iha tempu ne’ebá hodi haree ba rezolusaun konflitu nian,  maibé agora ita tama ba iha elisaun 2012, iha era ida ne’ebé maka konflitu resolve tia ona, entaun ami iha kooperasaun ho UNDP  atu bele fo apoiu, fundus ki’ik ba ONG sira, liu-liu konsentra ba iha areas   prevensaun konflitu, no hodi asegura pás no establidade  iha ita nia rain.

“Atividadeds ne’ebé ONG sira atu hala’o foka liu ba oinsá hasa’e kapásidade joventude sira nian iha  prevensaun konflitu tanba sira maka sai lider iha tempu oin mai”. Esplika Vise Ministru,

Deputy Country Director UNDP ba Timor-Leste, Noura Hamlazi,  iha nia intervensaun hateten katak, apoiu fundus ki’ik ida ne’e iha asuntu rua mak ita presiza haree  hanesan, oinsá haforsa knaar joventude nian sai hanesan lider ida ne’ebé atu halo prevensaun ba konflitu, no oinsá ko’alia kona-ba sensibilizasaun no sosializasaun ba lei Artemarsiál sira nian.

Noura Hamlazi  informa liutan katak, ho fundus ki’ik ida ne’e UNDP hakarak   kontinua apoiu nafatin MSS iha programa koezaun sosiál tanba ko’alia kona-ba prevensaun konflitu la’os ko’alia dala ida deit maibé ita ko’alia kona-ba kontinuidade, tanba ne’e UNDP hakarak kontinua apoiu MSS nafatin.

Iha parte seluk Elidio Gusmão nu’udar koordenador jerál ONG Community Transformation Institute (CTI), hosi Distritu Baucau  sente haksolok liuhusi apoiu fundus ki’ik ida ne’e, tanba bele servisu hamutuk ho parte hotu-hotu, Governu liuhusi  Ministériu Solidariedade Sosiál  no UNDP.

ONG 10 ne’ebé simu fundus ki’ik ne’e mak hanesan;  ONG ba Futuru, Community Transformation Institute Baucau, Belun, ETCRN, Forum Peduli Wanita Oecuse-FPWO, ONE-Distritu Lospalos, Ita Ba Pás, TLMDC, Fundasaun Mahein no JPC Liquisa