Governu Timor-Leste

Xefe Estadu Maiór Jenerál Falintil–Forsa Defeza Timor-Leste(F–FDTL), Koronel Falur Rate Laek, iha kuarta- feira, loron 20 fulan Setembru, halo enserramentu ofisiál ba kursu Fuzileiru Navál ba daruak nian iha Komponente Navál, Hera, Díli.

Membru F–FDTL sira ne’ebé partisipa iha gradusaun ba kursu ne’e hamutuk 32 kompostu hosi, ofisiál nain hitu, sarjentu nain sanulu resin lima, no soldadu nain sanulu .

“Ha’u orgullu no onra tebes,tanba ita mós bele hetan tan forsa ida ne’ebé importante tebes ba ita nia instituisaun ho ita nia istória ho ita nia nasaun. Ha’u hakarak informa ba imi tomak katak, imi nia karreira  sei naruk, imi manán ona vitória ida, maibé vitória kompletu imi seidauk manán, tanba ne’e dalan sei naruk ba imi, ba imi nia espíritu, ba imi nia neon no imi nia matenek, no ba imi nia desizaun no  determinasaun. Dalan hahú ona, planu trasa tiha ona, maibé só imi iha vontade, no iha pasiénsia maka sei sai fatór determinante ba imi nia karreira”, hateten Xefe Estadu Maiór Jenerál Falintil–Forsa Defeza Timor-Leste(F–FDTL), Koronel Falur Rate Laek.

Ha’u mós la haluha agradese ba ita nia instrutór Portugés sira ne’ebé durante ne’e lakon sira nia tempu tomak no didika sira nia vida tomak hodi  fó formasaun ne’e ho di’ak  atu nune’e forsa ne’e bele sai forsa ida ne’ebé profisionál no espesiál, bele halo atuasaun  iha tasi laran no mós bele atua iha rai maran hodi servi ba instituisaun F–FDTL no Povu no Nasaun ida ne’e.

Marka prezensa iha serimónia ne’e, Xefe estadu Maiór Jenerál  F-FDTL, Kolonel Falur Rate Laek, instrutór militár Portugés, Carvalho Relvas, Guarda Nacional Repúblicana (GNR) no ofisál sira F–FDTL hosi Komponente Navál nian.