Sorumutu Konsellu Ministru loron 19 fulan Setembru tinan 2012
Prezidénsia Konsellu Ministrus
V Governu Konstitusionál
-----------------------------------------------------------------------------------------------------
Díli, loron 19 fulan Setembru tinan 2012
Komunikadu Imprensa
Sorumutu Konsellu Ministru loron 19 fulan Setembru tinan 2012
Governu Konstitusionál V hala’o sorumutu iha kuarta-feira, loron 19 fulan Setembru tinan 2012, iha Sala Sorumutu Konsellu Ministru nian, iha Palásiu Governu, iha Díli, no analiza ona:
1. Alterasaun ba Akordu Empréstimu ho JICA
Alterasaun ne’e, hato’o husi Ministériu Finansa, hateten kona-ba redasaun ba aspetu ida ne’ebé halo parte husi Akordu Empréstimu, ne’ebe asina iha Maiu liubá. Redasaun foun ne’ebé hetan akordu husi parte rua, atuhodi evita katak JICA bele suspende mesamesak Akordu ne’e sein hetan konkordánsia husi Governu Timor-Leste.
2. Dekretu-Lei ne’ebé mak aprova Orgánika Ministériu Finansa nian
Ministériu Finansa hetan aprovasaun ba nia Orgánika, ne’ebé prevee kompeténsia foun tolu: ida halo jestaun ba fornesimentu bein sira ne’ebé sosa ba Ministériu no Sekretaria Estadu hotu-hotu; negosia, asina no jere implementasaun kontratu parseria públiku-privada sira nian no dezenvolve sistema informasaun jestaun finanseira nian iha servisu no organizmu hotu-hotu iha Administrasaun Públika.
Iha aspetu jerál, prioridade Ministériu Finansa nian, iha Governu ida ne’e, mak atu hetan tan reseita sira no, nune’e, Orgánika foun sei halo hanesan ba dezafius Programa Governu nian no ba objektivu Planu Estratéjiku Dezenvolvimentu nian to’o 2030.
Estrutura ida ne’e atu hodi fasilita hala’o objetivu sira estabilidade ekonómika, análize ba baze fizkál, reforsu sistema responsabilizasaun no fornesimentu informasaun finanseira ne’ebé maka presiza no tuir tempu.
