Timor-Leste aprezenta kondolénsia ba ofisiál diplomátiku Estadus Unidus Amérika ne’ebé mate no apela bá paz mundiál no toleránsia
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Díli, Loron 15 Fulan Setembru Tinan 2012
Timor-Leste aprezenta kondolénsia ba ofisiál diplomátiku Estadus Unidus Amérika ne’ebé mate no apela bá paz mundiál no toleránsia
Governu Timor-Leste aprezenta profunda kondolénsia bá família, belun no kolega sira hosi Embaixadór Estadus Unidus Amérika nian ba Líbia, J. Christopher Stevens, no ninia kolega sira na’in tolu, sira hotu mesak ofisiál sira norteamerikanu nian, ne’ebe mate iha atake hasoru edifísiu Konsuladu EUA nian, iha Benghazi, Líbia, iha semana liu ba.
Embaixadór ne’ebé durante tinan ruanulu liu bá servisu iha Médiu Oriente, nu’udar diplomata dahuluk ne’ebe hala’o knar iha Líbia, hafoin konflitu to’o iha nia rohan. Iha dezafiu boot hirak nia laran ne’ebe país hasoru, J. Christopher Stevens, kontinua promove poténsia boot ne’ebé mak atu realiza hosi povu Líbia nian, no nia mantein iha oin iha promosaun ba pás.
Infelizmente iha loron hirak ikus ne’e, iha protestu ne’ebe maka’as hasoru Estadus Unidus iha país barak iha mundu. Maski protestu barak hala’o ho forma pasífika, seluk violentu liu hahú mosu hasoru misaun diplomátika no komunidade hosi Médiu Oriente, parte sira hosi Áfrika no Estadus Unidus, Granbretaña, Alemaña no Austrália no seluk-seluk tan. Partisipante barak mak kanek, espektadór sira no ajente lei nian sira ne’ebé armadu.
Governu Timor-Leste hakarak hamutuk nia lian bá líder espirituál sira no mundu ne’ebé husu hakmatek no estabilidade. Timor-Leste kontinua firme nafatin iha solidariedade hó Estadu hotu-hotu ne’ebe hakarak promove pás no toleránsia entre sidadaun tomak iha mundu no kondena maka’as, kualkér tipu violénsia.
