Aniversáriu Konsulta Popular ba dasanuluk resin-tolu
Kinta-feira, loron 30 fulan Agostu tinan 2012, Timor-Leste komemora loron Konsulta Popular nian ba dasanuluk resin-tolu, iha Palásiu Governu, Díli.
Prezidente Repúblika, Taur Matan Ruak iha nia diskursu hateten katak “loron konsulta popular, hanesan autodeterminasaun ida ba ita-nia povu, ohin ita komemora tinan dasanuluk resin-tolu ba loron ne’e, referendu ne’e marka pontu-virajen fundamentál ida iha ita-nia istória nasionál,tanba ne’e ita tenke uza independénsia polítika nu’udar instrumentu ida atu halakon hamlaha,atu labele iha tan mal-nutrisaun ne’ebé sei kontinua estraga dezenvolvimentu labarik barak nian, iha aldeia barabarak, atu kombate ki’ak no mós atu harii neneik-neneik,moris di’ak ba familia sira Timor-Leste nian.
Objetivu sira ne’e iha ita nia liman,maibé ita só bele konsege hetan objetivu sira ne’e sai realidade ho servisu maka’as no partisipasaun hosi sidadaun sira hotu ba dezenvolvimentu, la’os buat ida ne’ebé estadu de’it maka bele halo mesamesak, atu hetan iha luta independénsia ekonómika, ita presiza unidade, ita presiza ema hotu-hotu nia servisu,maibé atu ita bele manán luta ba moris di’ak liután tenke servisu ho onestidade no laran-moos ,no ita tenke hala’o ita nia moris ho maneira simples’’, hatutan Prezidente Repúblika, Taur Matan Ruak.
Nune’e mós Xefe Estadu, Taur Matan Ruak, husu ba Governu no ba povu atu servisu hamutuk, ho laran-loos ,ho laran-moos ho espíritu sakrifísiu,atu hamenus ki’ak no atu uza rikusoin nasaun nian hodi harii país ida ne’ebé di’ak liután ,país ida ne’ebé prósperu liután ba Timor-Leste nia oan hotu-hotu.
Serimónia komemorasaun ne’e prezide hosi Prezidente Repúblika, Taur Matan Ruak,no Marka Prezensa mós hosi Primeiru-Ministru, Kay Rala Xanana Gusmão, Prezidente Tribunal Rekursu, Claudio Ximenes, Xefe Estadu Maiór Jenerál F-FDTL, Majór Jenerál,Lere Anan Timur,Ministru Adjuntu ba Asuntu Parlamentar Portugal nian, Miguel Relvas, Reprezentante Sekretáriu Jerál Nasoins Unidas iha Timor-Leste, Finn Rieske Nielsen, Komisáriu UNPOL, Luis Carrilho, Eis Titulár sira, membru Governu, Korpu Diplomátiku, veteranu no populasaun sira.
