—————————————————————————————————–
Díli, loron 31 fulan Agostu tinan 2012
Komunikadu Imprensa
Sorumutu Konsellu Ministru loron 29 fulan Agostu tinan 2012
Governu Konstitusionál V hala’o sorumutu iha kuarta-feira, loron 29 fulan Agostu tinan 2012, iha Sala Sorumutu Konsellu Ministru nian, iha Palásiu Governu, iha Díli, no analiza ona:
1. Aprezentasaun Pakote Fiskál ba Orsamentu Jerál Estadu nian ba tinan 2013
Ministériu Finansa aprezenta ona ba Konsellu Ministru regra sira kona-ba elaborasaun Orsamentu Jerál Estadu nian (OJE) ba tinan finanseiru 2013 no limite másimu despeza nian (envelope fiskál).
Elaborasaun Orsamentu Jerál Estadu nian ba tinan 2013, sei regula tuir intensaun V Governu Konstitusionál nian atu apoia reforsu komponente makro ekonómika ne’ebé kontribui atu hamenus kiak, hanesan kria empregu, kontrola inflasaun, manutensaun ba kresimentu ekonómiku no promosaun ba dezenvolvimentu iha área rurál sira.