Sorumutu estraordinaria Konsellu Ministru loron 25 no 26 fulan Agostu tinan 2012
Prezidénsia Konsellu Ministrus
V Governu Konstitusionál
-----------------------------------------------------------------------------------------------------
Díli, loron 25 no 26 fulan Agostu tinan 2012
Komunikadu Imprensa
Sorumutu Konsellu Ministru loron 25 no 26 fulan Agostu tinan 2012
Governu Konstitusionál V hala’o sorumutu estraordináriu iha loron ikus semana ida ne’e, loron 25 no 26 fulan Agostu tinan 2012, iha Salaun Nobre Ministériu Negósiu Estranjeiru no Kooperasaun nian, iha Dili no halo aprovasaun ba:
1. Programa Governu Konstitusionál V nian
Hafoin hala’o tiha análize ba esbosu Programa Governu Konstitusionál Dalimak iha sorumutuk dahuluk nian, Konsellu Ministru halo hikas fali revizaun ida kle’an ba dokumentu, kompostu husi pájina 72, hodi introdús alterasaun hirak ne’ebé maka presiza, hato’o husi titular sira pasta idak-idak nian, hodi nune’e bele hadi’a no kompleta dokumentu ne’ebé maka sei sai hanesan matadalan ba asaun Ezekutivu nian to’o tinan 2017.
Programa Governu Konstitusionál Dalimak nian sei kontinua implementa programa no reforma sira ne’ebé maka hala’o ho susesu husi Governu Konstitusionál Dahaat no bazeia mós ba Planu Estratéjiku Dezenvolvimentu nian tinan 2011-2030 mai hosi konsulta públika ida alargada, iha territóriu nasionál tomak, no aprova ona husi Parlamentu Nasionál iha fulan Jullu tinan 2011.
Programa Governu nian fornese dalan ne’ebé mak atu la’o nian ba dezenvolvimentu nasaun nian durante tinan lima oin mai, hodi halo lista ida kona-ba buat hirak ne’ebé maka presiza atu halo iha tempu badak nia laran, inklui mós estratéjia médiu prazu nian (tinan lima to’o neen), hodi haree nafatin ba longu prazu (tinan sanulu to’o ruanulu) atu alkansa vizaun koletiva povu timoroan nian ba nasaun ida ne’ebé moris ona iha dezenvolvimentu no pás nia laran iha tinan 2030.
Planeamentu, métodu estruturasaun kona-ba ideia sira no ideia sira Governu nian, iha filozofia polítika ida ho aspetu sósiu-ekonómiku ne’ebé signifika oferese kondisaun moris ne’ebé di’ak ba populasaun timoroan tomak, tuir espasu tempu no konkretu. Melloria ida ne’e, hala’o tuir nível ida-idak nian, beibeik no nafatin ba populasaaun nia nesesidade no ba meta dezenvolvimentu iha rejiaun hotu-hotu nasaun nian.
Governu Konstitusionál Dalimak konta ho konfiansa no ho koperasaun forsa moris hotu-hotu sosiedade nian, iha implementasaun projetu ne’ebé define ona iha Programa. Vontade povu timoroan nian maka fatór ne’ebé desizivu liu ba susesu implementasaun estratéjia dezenvolvimentu ba nasaun.
Programa Governu Konstitusionál Dalimak kompromete atu iha komportamentu polítiku ida tuir valór sira direitu síviku no umanu nian, toleránsia, pás, diálogu no respeitu no iha prátika governativa ida ho orientasaun hosi prinsípiu boa governasaun nian, inkluzaun no prinsípiu ne’ebé mak ema hotu-hotu tenke obedese ba lei.
Vizaun Governu Konstitusionál Dalimak ba Nasaun mak iha sosiedade ida próspera, saudável, matenek no kualifikada, ho asesu jerál ba bein no servisu importante sira ne’ebé produsaun no empregu iha setór produtivu hotu-hotu hatan kona-ba ekonomia ida emerjente. Governu nia objetivu maka kria oportunidade ba ema tomak, ho forma ida justa no ema hotu-hotu bele partisipa, hodi fó fatin ba kresimentu ekonomia ida ne’ebé dinámika no inovadora iha Timor-Leste.
