Sorumutu Konsellu Ministru loron 22 fulan Agostu tinan 2012
Prezidénsia Konsellu Ministrus
V Governu Konstitusionál
---------------------------------------------------------------------------------------------------
Dili, loron 22 fulan Agosto tinan 2012
Komunikadu Imprensa
Sorumutu Konsellu Ministru loron 22 fulan Agostu tinan 2012
Governu Konstitusionál V hala’o sorumutu iha loron Kuarta ida ne’e, loron 22 fulan Agostu tinan 2012, iha Salaun Nobre Ministériu Negósiu Estranjeiru no Koperasaun nian, iha Dili no halo parovasaun ba:
1. Proposta Lei kona-ba Orgánika Governu Konstitusionál V
Tuir fali husi sorumutu dahuluk Konsellu Ministru nian, iha loron 9 fulan Agostu, no hafoin halo tiha análize kle’an kona-ba kompeténsia hirak, ne’ebé ninia objetivu mak atu hadi’a diploma ne’e no hodi hatán ba nesesidade hirak ne’ebé titulár governu nian ida-idak konsidera importante atu hala’o sira nia funsaun, Konsellu Ministru aprova Orgánika Governu Konstitusionál V nian.
Konsellu Ministru halo mós análize ba:
1. Aprezentasaun kona-ba program Governu nian
Konsellu Ministru hakotu atu realiza sesaun servisu nian balun atuhodi halo análize ho detalle ba Programa Governu Konstitusionál V nian no elabora versaun ikus husi dokumentu ne’e.
2. Aprezentasaun kona-ba Orsamentu Retifikativu tinan 2012 nian
Konsellu Ministru halo fila-fali análize ba aprezentasaun kona-ba Orsamentu Retifikativu ba tinan 2012 ne’ebé sentra liu iha kestaun kona-ba responsabilidade finanseira sira no estruturasaun husi gabinete governu nian oinoin. Iha ámbitu ida ne’e, Komisaun Funsaun Públika aprezenta ba Konsellu Ministru
mapa kona-ba pesoál sira no kona-ba rekrutamentu iha Funsaun Públika ba tinan ida ne’e (2012) atu bele permite jestaun kona-ba rekursu umanu ne’ebé di’ak liu no meiu finanseiru ne’ebé atu afeta iha alterasaun ba Orsamentu tinan 2012 nian.
3. Aprezentasaun kona-ba kalendáriu ba Orsamentu Jerál Estadu nian ba tinan 2013
Kalendarizasaun kona-ba planu servisu nian atu elabora Proposta Lei kona-ba Orsamentu Jerál Estadu nian ba tinan 2013 dala ida tan sai hanesan alvu apresiasaun nian husi parte ezekutivu.
