Sekretáriu-Jeral Nasõens Unidas Sr Ban Ki-moon nomeia Sra Emília Pires ba Painel Altu Nível ba Ema Eminente sira kona-ba Ajenda ba Dezenvolvimentu pós-2015
Sekretáriu Estadu Konselhu Ministrus no
Porta-Vóz Ofisiál Governu Timor-Leste
Díli, Jullu 31, 2012
Sekretáriu-Jeral Nasõens Unidas Sr Ban Ki-moon nomeia Sra Emília Pires ba Painel Altu Nível ba Ema Eminente sira kona-ba Ajenda ba Dezenvolvimentu pós-2015
Governu Timor-Leste felisita Sua Eselénsia Emília Pires kona-ba nia nomeasaun ba Painel Altu Nível ba Ema Eminente sira, ne’ebe fo konsellu ba Organizasaun Nasõens Unidas nian kona-ba dezenvolvimentu global pós ajenda 2015. Ohin, Sekretáriu-Jeral Ban Ki-moon anunsia ba membru 26 iha painel katak sira sei halao sorumutuk ba dahuluk iha fulan Setembru. Ho loron Objetivu ba Dezenvolvimentu Milléniu atu besik ona iha 2015, Sra Pires sei fo kontribuisaun ba definisaun ba ajenda pós ODM ho “luta kontra kiak no dezenvolvimentu sustentável iha nia nukleu”.
Sra Pires lori ba pozisaun ida ne’e esperiénsia riku-soin lubuk ida, inklui tinan lima hanesan Ministra Finansas ba IV Governu Konstituisional, ne’ebe nia fo kontribuisaun ba importantes reformas ekonómikas maka sustenta estabilidade no dezenvolvimentu iha kursu aseleradu. Desde 2010, Sra Pires sai hanesan Prezidente g7+, hodi defende lian estadu sira ne’ebé afetadu husi konflitu no pós-konflitu. Hanesan Prezidenti, nia serbisu hamutuk ho Povu Timor-Leste, no mos ho nasõens sira seluk, sosiedade sivil, setór privadu no parseiru internasional sira ba identifika formas ba hadiak parserias dezenvolvimentu no aselera efikásia ajuda nian. Entre paizes g7+ no komunidade internasional, ema konsidera Sra Pires hanesan ema ida maka koalia lian foun ida, ho klareza no paixaun hodi konsege artikula pontu-de-vista estadu sira ne’ebé afetadu husi konflitu.
Ida ne’e simbóliku tebe-tebes ba Sekretáriu-Jeral Ban Ki-moon, konvida lian importante ida ba painel ida ne’e no testemuña ba realizasões maka Timor-Leste halo iha jeral hodi sai husi frajilidade ba rezilénsia, ho estabilidade ida ne’ebé kontinua , no ho kresente indikadores sosial no ekonómiku.
Ko-prezidentes ba Painel Altu Nível ba Ema Eminentes sira mak hanesan Prezidenti Repúblika Indonézia, Sua Eselénsia Susilo Bambang Yudhoyono, Prezidenti Repúblika Liberia, Sua Eselénsia Ellen Johnson-Sirleaf no Primeiru-Ministru Reinu Unidu, Sua Eselénsia David Cameron.
