IV GOVERNU KONSTITUSIONÁL

SEKRETARIA ESTADU KONSELLU MINISTRU

……………………………………………………………………………………………………………………………………….

KOMUNIKADU IMPRENSA

Toleránsia pontu iha loron 6 fulan Jullu tinan 2012

Governu Konstitusionál IV Repúblika Demokrátika Timor-Leste hakotu hodi fó toleránsia pontu iha loron 6 fulanJullu tinan 2012, durante loron tomak, ba funsionáriu no ajente hotu-hotu husi Ministériu sira ka servisu hirak ne’ebé depende ba sira, nomós instituisaun no organizmu hirak ne’ebé integra iha administrasaun indireta Estadu nian. Estabelesimentu Ensinu Públiku nian mós tenke taka durante loron tomak, iha loron rua: loron 6 fulan Jullu, sesta feira no loron 7 fulan Jullu, sábadu loron votasaun ninian.

Desizaun ida ne’e foti nu’udar kumprimentu ba artigu da-63 Konstituisaun Repúblika Timor-Leste nian ne’ebé estabelese sidadaun sira nia partisipasaun polítika. N.^u 1 husi artigu ne’e determina partisipasaun direta no ativa husi feto no mane sira iha vida polítika, ne’ebé sai nu’udar kondisaun no instrumentu fundamentál sistema demokrátiku nian.

Lei n.^u 6/2006, loron 28 fulan Dezembru, kona-ba atu eleitorál ba Parlamentu Nasionál, hatete iha n.^u 4 husi artigu da-37, katak sira ne’ebé sai hanesan responsável ba empreza ka servisu sira, públiku no mós privadu, ne’ebé hala’o atividade iha loron eleisaun nian, tenke fasilita traballadór sira hodi fó netik tempu natón atu sira bele ezerse sira nia direitu vota nian.

Nune’e, bazeia ba Lei n.^u 10/2005, loron 10 fulan Agostu nian, ne’ebé determina loron hirak ne’ebé sai hanesan feriadu nasionál, data ofisiál komemorativa no toleránsia pontu sira, Governu fó toleránsia pontu durante loron tomak, iha loron 6 fulan Jullu tinan 2012 atu permite sidadaun votante ne ebé iha resenseamentu iha fatin ida maibé hela iha fatin seluk fali, bele dezloka hodi ezerse sira nia direitu voto.