Sekretaria Estadu Juventude no Desportu liuhosi Diresaun  Nasionál Komunikasaun Sosiál  iha Sesta-feira, loron 4 fulan Maiu  tinan 2012 iha edifísiu SEJD ofisialmente  hala’o lansamentu  Kafé Internét no Biblioteka gratuitu ba públiku ho naran “Espasu Koñesimentu  5 de Maiu”.

Serimónia lansamentu ne’e hala’o diretamente hosi Sekretáriu Estadu Juventude no Desportu, Miguel M. G. Manetelu akompaña  hosi Diretór Jerál, Diretór Nasionál no Xefe Gabinete Sekrataria Estadu Joventude no Desportu nian nomós partisipante  sira husi Senadu Universitáriu  no estudante Eskola Sekundária  iha Díli laran.

“Hahú agora ba oin públiku liuliu estudante nivél Universitáriu  no Sekundáriu  sira iha kapitál  Dili iha liberdade asesu gratuitu ba Internét no Biblioteka, hateten Miguel Manetelo”.

Manetelu esplika tan katak, fatin ne’e ta’u naran “Espasu koñesimentu 5 de Maiu” tanba hanesan loron istóriku ida ba povu Timor-Leste. Sekretaria Estadu Juventude no Desportu  rasik,mak iha inisiativu harii “Espasu Koñesimentu 5 Maiu” ne’e, tanba haree katak, dala ruma juventude barak mak tuur iha tasi ibun la halo buat ida. Tanba ne’e husu ba joven sira, matenek ne’e tenke lee barak…, lee barak, ita koñese buat barak…,  nia tenik.

João dos Santos, Diretór Nasionál Komunikasaun hatete katak fatin refere agora daudaun iha ona Internét ho komputadór hitu, tuir planu sei aumenta tan komputadór balun, kona-ba  livru iha lian rua Indonézia  no Inglés inklui mós livru ho referénsia ba abilidade agríkula  no desportu  ho totál 3.200.

Oráriu ba utilizasaun, loke iha segunda-feira  to’o sesta-feira hahú  dadeer oras tuku sia to’o  tuku sanulu resin -rua meiudia, hafoin hahú fali tuku rua to’o tuku haat lokraik.