Prezidente Eleitu Taur Matan Ruak, iha loron 19 fulan Maiu iha Tasi Tolu, Dili, simu pose nu’udar Prezidente Repúblika Demokrátika Timor-Leste, ba períodu 2012-2017 hodi troka Prezidente Repúblika sesante, Dr. José Ramos Horta, iha Plenária Parlamentu Nasionál, ne’ebé prezide hosi Prezidente Parlamentu Nasionál, Fernando Lasama de Araújo.
José Maria Vasconcelhos “Taur Matan Ruak” hateten, iha ninia diskursu, “Iha loron ohin ha’u simu responsabilidade hodi xefia estadu ida ne’ebé hakmatek, estável no iha dame nia laran. Prezidente José Ramos Horta, dedika nia vida no tempu iha tinan haatnulu nia laran hodi serbí ita-nia povu no ita-nia nasaun. Ninia servisu no dedikasaun nu’udar ezemplu dia’k tebes no ita hotu tenke hetan inspirasaun hodi banati tuir. Agradese mós tanba iha koordenasaun di’ak ba tranzisaun hodi asegura katak buat hotu la’o di’ak ho maneira kompetente no tuir regra ne’ebé iha.
Taur Matan Ruak, haktuir tan katak, kbiit ne’ebé fó motivasaun mai ha’u atu kaer responsabilidade xefia Estadu Timor-Leste ne’e mai hosi Povu Timor tomak, maibé mós hosi ha’u nia família, ha’u-nia kaben, ha’u-nia oan sira, ha’u nia maun-alin, maluk no belun sira.
Ohin ha’u hahú simu knaar nu’udar Prezidente Repúblika, hateten ba povu tomak katak ha’u sei sai ezemplu ba povu tomak hodi servisu maka’as, kaer metin espíritu étika profisionál no sidadania nian, fó respeitu tomak ba konstituisaun no instituisaun sira ne’ebé garanti demokrasia no estadu-de-direitu no kumpri objetivu supremu hodi serbí povu, teknik Nia.
Prezidente foun ne’e apela tan katak, laiha ona tempu atu lakon tempu ba konflitu no lian naksalak ne’ebé folin laek, laiha ona fatin atu hanoin de’it servisu ba fama, prazér, podér, no rikusoin, tempu atu servisu maka’as, tempu atu hateke ba oin, tempu atu la’o hamutuk hodi hasees an husi mukit no terus ne’ebé sobu hotu ita nia futuru. Mai ita hamutuk fo liman ba malu, hodi nakfilak Timor-Leste sai nasaun ne’ebé riku, forte no hakmatek.
Iha serimónia ne’e mós Prezidente sesante, Dr. José Ramos Horta entrega mós kondekorasaun ordem-de-Timor-Leste, ba Francisco Xavier do Amaral, Nicolau dos Reis Lobato no Kay Rala Xanana Gusmão. Aleinde ne’e, Prezidente eleitu atribui mós ordem-de-Timor-Leste ba eis Prezidente Dr. José Ramos Horta.
Partisipa iha serimónia ne’e maka Prezidente Repúblika Indonézia Susilo Bambang Yudhoyono ho nia Damas Yani Yudohyono, prezidente Portugal Aníbal Cavaco Silva, Governadora jerál Austrália Quentin Bryce, AC, CVO, Governador Jerál Nova Zelándia Lt Gen RT Hon Sir Jerry Matepare no Governadór Jerál Tuvalo, Sir Iakoba Italeli, GCMG, membru Governu, reprezentante Sekretáriu Jéral Nasoins Unidas iha Timor-Leste, Ameerah Haq, Korpu Diplomatiku, konfisaun relijiozu, no povu Timor-Leste.