Timor Leste iha Expo tinan 2012 Yeosu Korea
Timor-Leste sei marka prezensa iha Expo tinan 2012 Yeosu Korea ne’ebé sei hala’o iha fulan Maiu to’o fulan Agostu, iha sidade Yeosu, Korea Sul.
Espozisaun Internasionál ne’e ho tema “ Moris Oseanu no Kosta nian, diversidade rekursu no atividade sustentável”.
Partisipasaun Timor-Leste nian, ne’ebé deside tiha ona iha sorumutu Konsellu Ministru nian iha Fulan Marsu tinan ida ne’e ho tema “ Bee kristalina no rai Henek Mutin”, tanba territóriu marítima nasionál dook husi poluisaun, mantein ambiente ida saudável iha tasi no kosta.
Símbolu ba partisipasaun Timor-Leste iha Expo tinan 2012 Yeosu Korea ho forma estilu lafaek ida. Nia pozisaun diagonál refere ba forma Illa nian. Forma kabuar reprezenta laloran tasi nian( tema sentrál ba feira ne’e). Ho aspetu formál, símbolu ne’e reprezenta “KAIBAUK” ( asesóriu tradisionál Timoroan nian) no “SURIK” ( espada tradisionál Timoroan nian). Kór sira ( kinur no mean) pertense ba bandeira Timor-Leste no kór azúl reprezenta kór oseanu nian.
Organizasaun ba Partisipasaun Timor-Leste nian responsabiliza husi Ministériu Turízmu, Komérsiu no Indústria, ne’ebé mak hetan suporte husi Diresaun Peska Ministériu Agrikultura no Peska nian, Diresaun Kultura, Ministériu Edukasaun nian, Sekretariadu ba Ambiente Ministériu Ekonomia no Dezenvolvimentu no Ministériu Infra-Estrutura.
