Toleránsia Pontu iha loron 17, 18 no 21 fulan Maiu tinan 2012
IV GOVERNO CONSTITUCIONAL
SECRETARIA DE ESTADO DO CONSELHO DE MINISTROS
.............................................................................................................................................
KOMUNIKADU BA IMPRENSA
Toleránsia Pontu iha loron 17, 18 no 21 fulan Maiu tinan 2012
Governu Konstitusionál IV Repúblika Demokrátika Timor-Leste deside fó toleránsia pontu iha loron 17, 18 no 21 fulan Maiu tinan 2012, durante loron-tomak, ba funsionáriu no ajente hosi Ministériu ka servisu dependente sira, nomós ba institutu no organizmu sira ne’ebé integra iha administrasaun indireta Estadu nian.
Desizaun ida ne’e foti tanba haree ba komemorasaun, iha loron 20 fulan Maiu tuirmai, nu’udar aniversáriu Dasanuluk Restaurasaun Independénsia nian. Komemorasaun tinan ida ne’e boot tebe-tebes tanba prienxe ho eventu oioin, molok no hafoin loron istóriku ida ne’e, Governu konsidera importante fó toleránsia pontu, hodi permite partisipasaun ema hotu-hotu nian iha selebrasaun sira ne’e.
Nune’e, tuir Lei n.0 10/2005, loron 10 fulan Agostu, ne’ebé maka determina loron sira feriadu nasionál nian, loron ofisiál komemorativa no toleránsia pontu sira, Governu fó toleránsia pontu durante loron-tomak, iha loron 17, 18 no 21 fulan Maiu tinan 2012, atu permite envolvimentu populasaun tomak iha festa aniversáriu Dasanuluk Restaurasaun Independénsia Timor-Leste nian.
