Iha loron 23 fulan Abril, Berlin, Ministru Negósius Estrangeirus Zacarias Albano da Costa, hala’o sorumutu ho Sekretária Estado Negósius Estranseirus Repubilika Federal Alemanha, Emily Haber. Iha sorumutu ne’e Zacarias hato’o agradesimentu ba Governo no povu Alemanha ba kompromisu  ho assiténsia hirak ne’ebé durante ne’e Timor-Leste hetan.

Iha oportunidade ne’e, Zacarias Albano da Costa explika kona-ba situasaun polítika, sosiál no desenvolivmentu Timor-Leste, realsa kona-ba susessu eleisaun presidensiál, prosessu adesao Timor-Leste ba ASEAN no mós futuru misaun UNMIT hafoin fulan Dezembru, tinan 2012.

“Ami  hein  katak Nacoes Unidas, hakotu nia missaun Peace Keeping iha Timor-Leste, maibé kontinua nafatin ho prezensa polítika importante iha Timor-LesteL”, hatután Ministru.

Governu Alemanha, liu hosi Emily Habert, “konsidera prosesu konstrusaun nasaun Timor-Leste ne’e susesu tébes. Governu Alemanha sei kontinua fó apoiu nafatin ba Timor-Leste iha nivel bilaterál no multilaterál.” Nia aproveita mós oportunidade ne’e atu fó agradesimentu bo’ot ba Governu Timor-Leste nia apoiu ba kandidatura Alemanha nian, iha forum internasional liu-liu ba Konselho Seguransa ONU.

Akompaña Ministru Negósius Estrangeirus Timor-Leste iha sorumutu ne’e Nelson Santos, Embaixador Timor-Leste nian ba Bruxelas, Reino Unido no Alemanha, Peter Badge, Consul Honorario Timor-Leste nian ba Alemanha, Emanuel Tilman, Xefe Gabinete.

Visita Ministru Zacarias mai Alemanha, hosi loron 20-24, atu halo mós inauguraaun ofisiál Konsul Honoráriu Timor-Leste nian iha Alemanha. Hafoin remata visita ne’e, Zacarias Albano da Costa ho nia delegasaun sei halo visita servisu ba Bruxelas, Belgica.