Iha Kinta-Feira, 26 Abril 2012, Ministru Negósius Estrangeirus Timor-Leste, Zacarias da Costa hala’o sorumutu ho Embaixadores no Representante Paises CPLP iha Brusselas, Belgica.

“Hau agradese Paises CPLP hotu ba apoio tomak durante ne’e fó ba Timor-Leste. Nune’e mós informa ba sira katak Timor-Leste iha intensaun hodi assume Presidensia CPLP iha tinan 2014.” Ministru Zacarias da Costa akresenta hafoin sorumutu ne’ebé organiza hosi Misaun Timor-Leste nian iha Brusselas.

Iha oportunidade ne’e mós, Zacarias explika ba Embaixadores no Representante Paises CPLP kona-ba situasaun aktual desenvolvimentu polítiku, ekonómiko no sosiál iha rai laran. Ministro akresenta mós kona-ba eleisaun presidensial ne’ebé lao ho susesu, adezaun Timor-Leste ba ASEAN, preparasaun ba eleisaun lejislativa, misaun UNMIT ne’ebé sei remata iha fulan Dezembru, tinan 2012.

Representantes hosi CPLP nebeé marka prezensa iha sorumutu ne’e felisita Governu no Povu Timor-Leste ba desenvolvimentu positivu no mós susesu ne’ebé Timor-Leste hetan ona durante ne’e. “Hau hakarak aproveita oportunidade ida ne’e hodi felisita Timor-Leste kona-ba desenvolvimentu internu ne’ebé durante ne’e lao hela. Felisita mós Timor-Leste kona-ba kresimentu ekonómiku no estabilidade iha rai laran”, katak Embaixador Sao Tome no Principe, Carlos Gustavo dos Anjos.

Hola parte iha reuniau ne’e representante hosi Brasil, Republika Mozambique, Sao Tome no Principiu, Guinne Bissau, Portugal, Cabo Verde no Angola.

Marka prezensa iha sorumutu ne’e Ministru Negósius Estranseirus Timor-Leste, Zacarias Albano da Costa, Embaixador Timor-Leste, ba Belgica, Alemanha no Reino Unido, Nelson Santos, Xefe Gabinete, Emanuel Tilman, Primeiro Secretario ba Embaixada Timor-Leste iha Brusselas, Fulgencio Corbafo, Diretór ba Administrasaun ba Embaixada Timor-Leste iha Brusselas.

Durante visita loron rua iha Brusselas, Ministro Zacarias mós hala’o lansamentu  livru iha Parlamentu Europeu ho titulo “Por Timor: Memorias de dez anos de Independencia” no mós expozisaun kona-ba Timor-Leste.