IV GOVERNU KONSTITUSIONÁL

SEKRETARIA ESTADU KONSELLU MINISTRU

……………………………………………………………………………………………………………………………………….

KOMUNIKADU IMPRENSA

Loron 30 fulan Abril tinan 2012

Primeiru-Ministru apela kona-ba Patriotismu durante Komemorasaun Restaurasaun Independénsia

Primeiru-Ministru, Kay Rala Xanana Gusmão, hodi Governu Konstitusionál Dahaat nia naran, fó-hatene ba timoroan hotu-hotu atu hahú hosi loron 1 to’o loron 31 fulan Maiu, atu hasa’e Bandeira Nasionál Timor-Leste nian, iha sira nia hela fatin no mós iha edifísiu komersiál sira.

Ho asaun ida ne’e,  Governu hakarak envolve timoroan tomak iha komemorasaun ofisiál sira  Restaurasaun Independénsia nian, hodi nune’e, bele partisipa diak liu tan iha festa sira ne’ebé sei hala’o iha Timor-Leste.

Iha fulan Maiu nia laran, Nasaun sei simu vizita na’i ulun boot sira hosi Nasaun belun sira no entidade sira barabarak ne’ebé horiuluk kedas fó nafatin sira nia kontribuisaun ba libertasaun nasionál. Governu hakarak atu simu sira hotu-hotu ho didi’ak iha komemorasaun sira ne’ebé  sei to’o iha nia pontu aas  mak komemora Restaurasaun Independénsia ba dasanuluk – loron 20 fulan Maiu – data ida istórika ba timoroan hotu-hotu ne’ebé mak durante tinan barak nia laran, luta ba Pátria ida livre, soberana no independente.

Hahalok ne’e sei sai nu’udar sasin ba sentimentu patriótiku timoroan sira nian, be sente orgullu ba independénsia ne’ebé mak sira hetan iha loron 20 fulan Maiu tinan 2002.