Bombeiros Timor-Leste , iha  Segunda-feira, loron, 23 Abril tinan 2012, iha Diresaun Nasionál Protesaun Sivil Kaikoli Dili, Selebra ninia Aniversáriu ba dasanuluk resin-rua, ho ninia Lema ’’Prontu Atu Servi’’

Diretór Nasionál Protesaun Sivil, Domingos Pinto, iha nia diskursu hateten, “Selebrasaun aniversáriu Bombeiros Timor-Leste nian ba dasanuluk resin-rua ne’e, hatudu katak instituisaun Bombeiros harii ka Moris tiha ona iha ita nia rai molok ita restaura ita nia independésia,tanba ne’e Bombeiros maka hanesan liman ain ka komponente operasionál protesaun sivil nian,atu hodi atende situasaun emerjénsia no dezastre ruma bainhira mosu”.

Domingos  Pinto hatutan, “iha tinan sanulu resin rua nia laran ita tenta dezenvolve nafatin instituisaun Bombeiros iha ita nia rai, no komesa harii ona korpu Bombeiros iha distritu hitu no hela tan distritu neen tanba ne’e,  iha loron 20 fulan Fevereiru 2012 liubá, ita hala’o ona formasaun ba Bombeiros foun hamutuk nain 23 hodi harii Korpu Bombeiros iha Distritu Covalima no sira remata ona sira nia formasaun baze no ohin iha serimónia  ida ne’e sira husik ona atributu rekruta nian no sira simu fali atributu Bombeiros profisionál nian hodi hala’o sira nia servisu. Tanba ne’e la fásil atu harii korpu Bombeiros ida ,no tuir planu diresaun ida ne’e nian, atu harii tan korpu Bombeiros  neen ne’ebé sei falta  iha distritu neen iha ita nia rain”.

Diretór ne’e mós fó parabéns ba korpu Bombeiros tomak liu hosi aniversáriu ne’e no apela “ ita hein katak ho imi nia aniversáriu  tinan ne’e  imi bele servisu di’ak liután hodi servi ita nia povu no ita nia rai doben Timor-Leste tuir imi nia lema prontu Atu Servi”.

Sekretáriu Estadu Seguransa, Francisco Guterres, fó  parabéns ba Bombeiros Timor-Leste sira tanba ohin komemora loron espesiál Bombeiros Timor-Leste nian, “ita hotu hatene katak dezenvolvimentu Bombeiros nian tenke bazeia ba iha planu ida no nesesidade ida, katak bainhira dezenvolvimentu ne’e la’o maka’as maka Bombeiros ninia servisu ne’e mós sa’e maka’as, tan ne’e prezensa Bombeiros nian ne’e importante tebe-tebes. Tanba ne’e maka dala ida tan, ha’u lori IV Governu Konstitusionál nia naran hato’o parabéns ba ita-boot sira tan ita-boot sira maske ho kondisaun ne’ebé minimu tebes,maibé ita-boot sira fó laran  duni hodi servisu ba povu ida ne’e no rai ida ne’e”.

Hafoin hala’o tiha serimónia, entrega mós atributu ba Korpu Bombeiros  foun hamutuk ema nain 23 ne’ebé sei koloka ba iha Distritu Covalima. Iha oportuniade ne’e mós Sekretáriu Estadu  Seguransa, akompaña hosi Sekretáriu Estadu Defeza, Prezidente Komisaun Funsaun Públika no Embaixadór kuba iha Timor Leste, hala’o vizita ba Instalasaun Diresaun Nasionál Servisu Protesaun Sivil nian.