Primeiru-Ministru asumi kompeténsia sira Ministra Justisa nian
IV GOVERNU KONSTITUSIONÁL
SEKRETARIA ESTADU KONSELLU MINISTRU
..........................................................................................................................................................
KOMUNIKADU IMPRENSA
Loron 23 fulan Abril tinan 2012
Primeiru-Ministru asumi kompeténsia sira Ministra Justisa nian
Primeiru-Ministru, Kaya Rala Xanana Gusmão, asumi ona, iha loron 23 fulan Abril tinan 2012, kompeténsia sira Ministra Justisa nian, hodi nune’e, bele garante kontinuidade ba atribuisaun própria Ministériu Justisa nian.
Medida ne’e mosu tanba suspensaun ne’ebé Parlamentu Nasionál halo, ba kna’ar Ministra Justisa Lúcia Lobato nian tuir pedidu husi Tribunál Distritál Díli, tanba motivu judisiál sira.
Salienta katak iha n.° 3 husi artigu 6° Lei Orgánika IV Governu Konstitusionál nian, tuir Dekretu-Lei n.° 15/2010, loron 20 fulan Outubru, prevee katak Xefe Governu iha podér atu foti desizaun kona-ba matéria sira ne’ebé mak inklui ona iha área tutela iha kualkér Ministériu ka Sekretaria Estadu.
Exersísiu kompeténsia ne’e sei prolonga tan bainhira sei kontinua hala’o suspensaun ba kna’ar Ministra Justisa nian, ne’ebé mak sei termina iha finál prosesu judisiál.
