Governu Timor-Leste

“Promove Rekonsiliasaun: atu hetan Pás no Prosperidade iha Ázia” ne’e mak lema Konferénsia konjunta ICAP-CAPDI nian kona-ba Pás no Rekonsiliasaun ne’ebé sei hala’o iha Sentru Konvensaun Díli nian, iha loron 25 no 26 fulan Abríl tinan 2012.
Konferénsia Internasionál ne’e, hala’o husi Governu Timor-Leste no organiza husi Konferénsia Internasionál Partidu Polítiku sira Ázia nian (ICAPP - Centrist Conference of Asian Political Parties) no Internasionál Demokrata Sentrista husi Ázia Pasífiku (CAPDI – Centrist Asia Pacific Democrat International) sei halo abertura ofisiál husi Primeiru-Minisntru Timor-Leste nian, Kay Rala Xanana Gusmão, ne’ebé sei tuir kedas ho diskursu ida husi Prezidente Repúblika Demokrátika Timor-Leste nian, Dr. José Ramos Horta. Serimónia abertura nian sei konta ho partisipasaun husi Jose Venecia Jr., prezidente fundadór ICAPP no CAPDI, no Hun Sen, Primeiru-Ministru Kambodja nian.
Konferénsia ne’e sei iha sesaun haat ne’ebé sei hala’o durante loron rua.
Iha loron Kuarta, loron 25 fulan Abril, durante dadersan tomak, hafoin abertura ofisiál ne’ebé marka ba tuku sia dadeer, sei hala’o sesaun dahuluk, kona-ba “Pás no Rekonsiliasaun iha Ázia (esperiénsia husi Timor-Leste)” ne’ebé Maria Domingas Alves, Ministra Solidariedade Sosiál Timor-Leste nian mak sei aprezenta. Hafoin han loro-manas nian, sesaun daruak nian sei hala’o, sei nafatin kona-ba “Pás no Rekonsiliasaun iha Ázia (esperiénsia husi Kambodja)” ne’ebé sei aprezenta husi Sok An, reprezentante Primeiru-Ministru Kambodja ne’ebé sai mós hanesan Vise-Prezidente CAPDI no membru Komité ICAPP nian.
Iha loron 26 fulan Abríl, Kinta-feira, sesaun datoluk nian hahú iha oras tuku 9 dadeer, ko’alia kona-ba tema “Jestaun Rekursu Naturál ba Prevensaun Konflitu. Tuir fali mak sesaun dahaat: “Mudansa Klima nian no Rekursu Naturál, Oportunidade ba Rezolusaun Konflitu”, aprezenta husi Jing Min-jun, Diretór-Jerál Organizasaun Kooperativa Internasionál Eko-Seguransa (IESCO–International Eco-Safety Cooperative Organization) no husi Jacinto Rigoberto Gomes de Deus, Sekretáriu Estadu Asisténsia Sosiál no Dezastre Naturál Timor-Leste nian.
Iha serimónia enserramentu nian, ne’ebé Primeiru-Ministru, Kay Rala Xanana Gusmão, mak sei dirije, no hafoin apezentasaun kona-ba rezultadu konferénsia nian, partisipante sira tenke adota Deklarasaun Timor-Leste. Molok halo Konferénsia Imprensa, ne’ebé marka ona ba tuku 5 loraik, Chung Eui-Yong, Sekertáriu-Jerál no Prezidente ICAPP, sei halo diskursu enserramentu nian.