Governu liu hosi Primeiru-Ministru Kay Rala Xanana Gusmão nuudar mós Ministru Defeza no Seguransa inaugura edifisiu foun Ministériu Defeza no Kuartel Jerál F-FDTL, loron tersa 03 fulan Abril 2012, iha Fatuhada, Dili.

Primeiru-Ministru Kay Rala Xanana Gusmão nu’udar mós Ministru Defeza no Seguransa, hato’o nia intervensaun iha serimonia inaugurasaun ne’e “Uluk ha’u dehan, no ha’u tenik fali, katak ita labele ejije ba instituisaun sira Estadu nian atu dezempenã ho aten brani no profisionalismu sira nia obrigasaun bainhira ita la oferese kondisaun servisu nian ne’ebé di’ak no apropriadu. Sekretaria Estadu Defeza nune’e mós ba Kuartél-Jenerál F-FDTL nian hahú hori uluk kedas sira okupa nafatin instalasaun hirak ne’ebé kiik hela no liu-liu ba ita nia militár sira laiha kondisaun mínima dignidade nian, tanba ne’e serimónia ida ne’e hatudu importánsia boot tebes no mós ba ha’u nu’udár Xefe Governu no Ministru Defeza no Seguransa, ha’u sente orgullu tebes-tebes no sente kumpri ona ha’u nia devér.”

“Ba sira hotu-hotu ne’ebé sei uza instalasaun ida ne’e ha’u husu atu kuida didi’ak tuir hanesan ne’ebé imi simu ne’e. Ba imi hotu-hotu feto ka mane ne’ebé servisu iha fatin ida ne’e iha obrigasaun atu tau matan ba manutensaun uma ne’e nian, hodi labele permite ema ida atu estraga fali uma ne’e”, tenik Primeiru-Ministru no Ministru Defeza no Seguransa.

Iha fatin hanesan Embaixadór Xina Iha Timor-Leste, Tiang Guang Feng lori Governu Xina promote sei apoiu nafatin prosesu dezenvolviemntu iha Timor-Leste.

Majór Jenerál, Lere Anan Timur, agradese ba Governu Xina nia apoiu hodi dezenvolve F-FDTL, liu hosi apoiu ba edifisiu foun ida ne’e, ho edifisiu foun ida ne’e bele hamenus mos problema  no difikuldade sira ne’ebé maka durante ne’e F-FDTL hasoru.

Partisipa iha serimónia ne’e, Primeiru-Ministru no Ministru Defeza no Seguransa, Kay Rala Xanana Gusmão; Prezidente Repúblika, José Ramos-Horta; Prezidente Parlamentu Nasionál, Fernando Lasama de Araújo; Prokuradora Jerál Repúblika, Ana Pessoa; Embaixadór Xina iha Timor-Leste, Tiang Guang Feng; membru Governu ho membru Parlamentu Nasionál sira no korpu diplomátiku sira hotu.