Ministro Infra-Estruturas, Pedro Lay, reprezenta Governu Timor-Leste simu ajuda finanseira ba rehabilitasaun no manutensaun estrada iha área rurál ho dólar austrália, millaun 30, hosi Australian Aid (AusAid) ne’ebé Ambasadór Austrália ba Timor-Leste entrega liu hosi asina akordu iha Salaun Ministériu Infra-Estruturas, iha loron 29 fulan Marsu 2012, iha Díli.

Akordu ne’e sei implementa hosi Sekretaria Estadu Obras Públikas, liuhosi Diresaun Nasionál Pontes, Estradas no Kontrole de Xeias iha tinan haat nian laran, ho etapa dahuluk sei implementa iha distritu lima, hanesan, Distritu Baucau, Dili, Aileu, Ermera no Manufahi.

Ministru Infra-Estruturas, Pedro Lay, hateten “Ho tulun ida ne’e, ita bele atinji ona objetivu estadu nian, iha Planu Estratéjiku Dezenvolvimentu ne’ebé ita-nia Primeiru-Ministru, lansa iha tinan kotuk. Ne’e katak, ita tomak tenke iha mehi atu bele atinji objetivu ida hodi bele fo asesu di’ak liu ba ita nia populasaun,” esplika Ministru.

Iha fatin hanesan Embaixadór Austrália ba Timor-Leste hanesan reprezentante Australian Aid hateten “Ita hotu servisu hamutuk hodi atinji objetivu planu dezenvolvimentu fíziku Timor-Leste nian, ho apoiu finanseiru ba reabilitasaun Estrada rurál sira, ne’ebé mós sai hanesan prioridade iha akordu ida ne’e,” tenik Embaixadór Miles Armitage.

Miles Armitage hatutan tan “Iha tinan haat oin mai programa estrada ba dezenvolvimentu ne’e sei tuir dezeñu estrada rurál no asegura katak, apoiu ne’e sei rehabilita no halo manutensaun ba estrada ho kilómetriu, 1.150 sei mantein ho kondisaun ne’ebé di’ak. Aleinde ne’e sei fó opotunidade servisu ba povu sira hamutuk ema rihun 50 iha tempu badak, hodi aumenta sira nia esperiénsia servisu no hasa’e ekonomia komunidade nian iha suku sira”.