Ministru Negósiu Estranjeiru, Zacarias Albano da Costa, iha segunda-feira, loron 9 fulan Abril, simu nia omólogu mosambikanu, Oldemiro Balói ne’ebé halo vizita ofisiál ida mai Timor-Leste durante loron tolu.

Iha konferénsia imprensa ida, Zacarias Albano da Costa ko’alia kona-ba amizade ne’ebé eziste ona entre país rua ne’e: “

Mosambike no Timor-Leste unidu husi lasu istóriku no afetivu. Ita nia na’i ulun barak iha oportunidade hodi moris, estuda no servisu iha Mosambike, no sira sente kariñu, amizade, apoiu no solidariedade ne’ebé Governu no povu Mosambike fó ona ba ita nia nasaun. Ohin ita iha faze ida oin-seluk maibé importante tebes ba ita atu vizita hikas fali, reforsa liután relasaun amizade no fraternidade ne’ebé mak halo ita hamutuk”.

Oldemiro Balói halo mós referénsia sira ba relasaun amizade entre nasaun rua ne’e:”Ita nia realasaun sira folin boot tebes. Tuir señor Ministru Zacarias hateten katak hanesan relasaun istórika sira! Istória ida ne’ebé kle’an : ita terus hamutuk, ita luta hamutuk, hamutuk ita manán no ohin ita hamutuk harii ita nia nasaun sira, no hamutuk ita fó kontribuisaun ba mundu ida di’ak liu”.

Durante sorumutu bilaterál, hala’o ona akordu hodi estabelese komisaun mista ida ba kooperasaun entre país rua ne’e.

“Nune’e, iha tempu ida ne’ebé badak, ha’u hein katak ita nia funsionáriu superiór sira sei servisu atu ita bele asina akordu ida hodi estabelese komisaun mista kooperasaun nian ne’e”, tenik Ministru Zacarias Albano da Costa hodi hatutan mós katak sira diskuti ona área sira seluk ne’ebé mak relevante: “ami konkorda mós atu reforsa liután kooperasaun iha área Edukasaun no Justisa. Ami hakarak troka esperiénsia hanesan iha área esplorasaun rekursu minerál sira, liu-liu, gás no minarai. Ami sei asina mós protokolu ida hodi hala’o beibeik konsulta iha nível polítiku no diplomátiku no mós iha área multilaterál”.