Lansamentu Portal Transparénsia foun kona-ba Apoiu sira
![aid-transparency-portal1-594x265 (2)](https://timor-leste.gov.tl/wp-content/uploads/2012/04/aid-transparency-portal1-594x265-2.jpg)
Iha lorn 2 fulan Abril, Ministra Finansas, Sra. Emilia Pires lansa Portal Transparénsia kona-ba Apoiu, ba iha liña ministerial sira iha Workshop “Yellow Road” nian.
Portal Transparénsia kona-ba Apoiu ne’e mak hanesan instrumentu públiku ida hodi asessu ba internet. Nia aprezenta data katak parseiru dezenvolvimentu sira tama iha Plataforma Jestaun Apoiu foun Ministériu nian, ne’ebé mak agora sai hanesan resipiente sentral ba informasaun apoiu hothotu iha Timor-Leste.
Ministra Finansas, Sra. Emilia Pires dehan katak, website no sistema foun ida ne’e sei dezenvolve jestaun apoiu nian, liu-liu presizaun no prediktabilidade iha halo relatóriu kona-ba apoiu sira ne’e.
“Bainhira halo relatóriu diak, signifika katak ita bele asegura katak assistensia ne’ebé mak fornesidu sei efisiente no efikaz liu” nia dehan. “Nune’e mos bele ajuda Governu hodi prepara Orsamentu Estadu ne’ebé ho kualidade, hodi hatan ba nesesidade ita nia sidadaun sira nian.”
Ministra Pires haree katak, ajénsia sira parseiru dezenvolvimentu nian mos presiza informasaun kona-ba aktividade sira husi parseiru dezenvolvimentu seluk nian ne’ebé mak halo servisu iha Timor-Leste, hodi nune’e sira bele koordena esforsu diak liu, hamenus sobrepozisaun no haree bá prioridade sira ho efikásia liu.
“Portal Transparénsia kona-ba Apoiu sira, no sistema ne’ebé mak iha ninia kotuk, ajusta-an tiha hotu ona tuir ita nia nesesidade sira no halo sai útil liu tan”, dehan Ministra Pires.
“Ema sei bele uza portal ida ne’e hodi halo revizaun ba projektu apoiu sira hosi rai liur, halo tabela, gráfiku no mapa produsaun nian hodi monitoriza tendénsia importante no estatístika sira, no produs relatóriu sira kona-ba despeza dezenvolvimentu públiku. Importante liu mak, portal ne’e enkoraja koordenasaun diak liu tan ho doador sira”.
Portal ida ne’e bele hetan
- liu hosi Portal Transparénsia Governu Timor-Leste nian www.transparency.gov.tl, ka
- liu direktamente ba www.aidtransparency.gov.tl.
Informasaun ne’ebé mak tama ba iha sistema Plataforma Jestaun Apoiu nian sei fornese hosi parseiru dezenvolvimentu sira, no tuir mai sei hetan validasaun, tantu hosi Govrenu no parseiru dezenvolvimentu sira. Informasaun ne’e sei disponivel ba parseiru dezenvolvimentu hothotu no ba Governu atu bele asesu no halo revizaun.
Ministériu Finansas, liu hosi Diresaun Nasional ba Efikásia Apoiu nian mak sei halo supervizaun ba koordenasaun no jestaun apoiu sira nian iha Timor-Leste. Diresaun Nasional ba Efikásia Apoiu nian sei kontinua servisu hamutuk ho parseiru dezenvolvimentu hothotu bainhira atu tama no atu halo validasaun ba data iha sistema ne’e.
Plataforma Jestaun Apoiu (AMP/PJA) dezenvolve tiha ona ho ajuda hosi Governu Japaun, Austrália no Banku Dezenvolvimentu Aziatiku.