Sekretaria Estadu Promosaun Igualdade (SEPI) loron 7 Marsu, iha salaun Delta Nova, Komoro, Dili hala’o semináriu ba loron internasionál feto ho tema,“Partisipasaun feto foinsa’e iha dezenvolvimentu nasionál lori mudansa ba futuru”. Mai ita servisu hamutuk atu promove igualdade jenéru iha Timor-Leste”.
Sekretária Estadu Promosaun Igualdade, Idelta Maria Rodrigues iha abertura hateten, “semináriu ida ne’e importante tebetebes, ita hotu akompaña hela katak atu ko’alia kona-ba igualdade jenéru ita ko’alia ba aspetu ho setór hotu-hotu, ita la’ós haree de’it ba asuntu ka setór ida maibé ita haree hanesan aborda igualdade jenéru iha programa tomak iha estadu no instituisaun tomak.
Idelta haktuir tan, “iha tema internasionál ne’ebé ita ko’alia kona-ba Conecting Girls Inspire Future ne’e katak halibur feto foinsa’e inspira ba futuru. Importante tebetebes atu enkoraza joven sira atu komprende kona-ba papél iha sosiedade nu’udar sidadaun ida ne’ebé hola parte iha prosesu dezenvolvimentu nasaun ida ne’e nian”.
Sekretáriu Estadu Juventude no Desportu, Miguel Manetelo hateten katak, bainhira ita ko’alia kona-ba partispasaun feto iha dezenvolvimentu nasionál iha parte juventude no desportu, dala barak ema hanoin de’it partisipasaun iha vida polítika, ida ne’e mak ita haree daudaun, ita la hateke ba setór sira seluk maibé dalaruma setór sira seluk seidauk urjente.
“Ema sira ne’ebé halo atividade desportiva konserteza joven sira, tanba ne’e mak ko’alia juventude liga mós ba desportu, kuandu ita ko’alia kona-ba dezenvolvimentu iha juventude ita ko’alia dezenvolvimentu karáter joven sira nian, atu transforma mentalidade, karáter ida ne’e, atu bele sai sidadaun ne’ebé siviku hodi bele partisipa iha prosesu konstrusaun estadu ho nasaun. Agora knaar ami nia mak oinsa atu dezenvolve karáter joven sira nian liuhosi desportu.
Reprezentante Ministériu Agrikultura no Peska, Lourenço Fontes hanesan mós Diretór Jerál MAP informa katak, tópiku iha selebrasaun ohin ne’e todan tebetebes, partisipasaun feto foinsa’e iha dezenvolvimentu nasionál hodi halo mudansa iha futuru ne’e katak sá, bainhira ita ko’alia jenéru la’ós feto de’it, ita ko’alia kona-ba jenéru ne’e, ita ko’alia kona-ba balansu, tenke halo servisu hanesan, kondisaun ne’ebé mak ita hetan iha rai-timór ne’e no ita seidauk komprende didi’ak ita nia pozisaun oinsá, kona-ba balansu jenéru ne’e iha ita-nia servisu fatin. Tan ne’e husu ba feto foinsa’e sira atu prepara an halo didi’ak saida mak ami mane halo imi feto mós bele halo”.
Oradór sira ba seminariu ne’e mak hosi Parlamentu Foinsa’e ne’ebé lori topiku kona-ba Papel parlamentu Foinsa’e iha Sosiedade no kontribuisaun ba dezenvolvimentu Nasionál, oradór internasionsionál sira, hosi Indonézia, Marissa Haque ho tópiku “peranan perempuan dalam wacana hukum yang sensitive terhadap isu gender”, no Ikang Fawzi “motivasi kaum muda untuk berkreatifitas dalam pembangunan nasional, no Prezidente Konsellu Nasionál Juventude Timor-leste, Leo Vigildo Hornai, tópiku perspspetiva ‘ juventude Timor-Leste ba dezenvolvimentu igualade jéneru”.