Primeiru Ministru hala’o vizita ba Japaun no Indonézia
Primeiru-Ministru, Kay Rala Xanana Gusmão, hala’o vizita ba Japaun no Indonézia iha semana oin. Viajen ne’e reprezenta oportunidade ida atu hametin relasaun di’ak ne’ebé Timor-Leste mantein ona ho rai rua ne’e.
Iha Japaun, Primeiru-Ministru sei hala’o sorumutu ne’ebé marka tiha ona ho ninia omólogu, Yoshihiko Noda, atu aserta kontratasaun kona-ba empréstimu ida ho Governu Japaun nian ne’ebé sei haree ba oinsá promove estabilizasaun ekonómika no esforsu sira kona-ba dezenvolvimentu Timor-Leste nian. Ministra Finansa ne’ebé akompaña Xefe Governu ba Japaun, sei hala’o sorumutu ho responsável sira atu asina kontratu ne’e.
Iha sorumutu sira seluk, Primeiru-Minsitru sei atualiza ba autoridade Japaun nian sira kona-ba progresu Timor-Leste nian no sei insentiva ba aumentu husi investimentu no interasaun entre nasaun rua ne’e. Kay Rala Xanana Gusmão, sei koa’lia mós ba komunikasaun sosiál, nasionál no internasionál.
Husi Japaun, Primeiru-Minisstru sei mai fali Jakarta, Indonézia, nia sei partisipa, hamutuk ho dignatáriu sira seluk, hanesan Sekretáriu-Jerál Nasoins Unidas nian, Ban Ki-moon, tuir mai sei hala’o “Diálogu Internasionál Jakarta nian kona-ba Defeza”, ho tema "Operasaun militar hirak ne'ebé la halo funu: perspetiva rejionál no nasionál", ne’ebé Prezidente Repúblika Indonézia nian, Susilo Bambang Yudoyono mak organiza.
“Diálogu Internasionál Jakarta nian kona-ba Defeza” ne’e fórun importante ida ba Timor-Leste atu bele reforsa kooperasaun iha área seguransa nian ba nível multilaterál no rejionál.
