SES entrega viatura no ekipamentu ba PNTL
Governu, liuhosi Sekretaria Estadu Seguransa (SES), entrega iha sesta-feira, loron 9 fulan Marsu, viatura no ekipamentu sira ba Polísia Nasionál Timor-Leste (PNTL). Francisco Guterres, Sekretáriu Estadu Seguransa nian, entrega rasik ba Komandante Jerál PNTL nian, Komisáriu Longuinhos Monteiro, ekipamentu sira hanesan: elevadór Forklift (1), mini bus (2), kareta bee nian 1, motorizada Susuki Hander 125 (15), motorizada Kawasaki (15), kareta Toyota Hilux (30), kapa ba udan (700 unidade), lámpada (640), kolsaun portátil (700), tenda (10), eskudu (700), olofote (18) no luvas (700).
Komisáriu Longuinhos Monteiro, iha nia liafuan badak hateten, hodi Komandante Jerál PNTL nia naran fó agradesimentu ba Governu liuhusi Ministériu Defeza Seguransa no Sekretáriu Estadu Seguransa tanba bele responde nesesidade Polísia nian, nesesidade ne’ebé bele dehan sai hanesan preokupasaun mós hosi ita nia órgaun soberanu sira, bainhira hala’o vizita ba iha distritu sira sempre haree realidade katak, Polísia ninia funsaun labele dezempaña di’ak tanba falta ekipamentu.
Longuinhos Monteiro hatutan, “profisionálismu membru sira nian la’os ita sukat ho sira nia kapasidade rekursu umanu, maibé meiu atu halo servisu nian, hanesan ekipamentu sira ne’e, kontribui mós ba sira nia profisionalismu”. Longuinhos mós husu ba distritu, Unidade no Departamentu sira ne’ebé simu kareta ne’e katak ne’e kareta operasionál no tenke uza ba nesesidade operasionál sira polísia nian.
Iha fatin hanesan Sekretáriu Estadu Seguransa, Francisco Guterres, informa katak apoiu ida ne’e hanesan kompromisu IV Governu Konstitusionál nian, atu dignifika PNTL hodi hala’o servisu no defende Soberania Estadu ida ne’e nian atu nune’e Estadu ida ne’e bele la’o ho di’ak, tanba ita PNTL hanesan pilar importante ida ba dezenvolvimentu demokrasia nian. Tanba ne’e mak Estadu iha devér atu fó ekipamentu no tau kondisaun mínimu ba PNTL atu bele servisu. Sekretáriu Estadu Francisco Guterres ne’e mós, husu ba Komandante Jerál no Komandante sira seluk atu toma responsabilidade hodi haree no monitoriza uzu kareta ho di’ak, kareta ida ne’e tenke uza hodi hala’o servisu uza ho kuidadu no uza ho responsabilidade.
