Loron 6 fulan Marsu tinan 2012, Francisco Xavier do Amaral ho tinan 75, mate iha Ospitál Nasionál Guido Valadares, iha Díli.

Francisco Xavier do Amaral, nu’udar Proklamadór ba Independénsia Timor-Leste nian, iha loron 28 fulan Novembru tinan 1975 no hafoin simu pose hanesan Prezidente Repúblika.

Hori uluk kedas nu’udar funu na’in ida ba independénsia nasionál, hetan limitasaun ba ninia liberdade no, Timor-Leste rekoñese nia hanesan Figura ida Importante tebetebes iha Luta ba Libertasaun no Independénsia nasaun nian, ohin sente laran triste ba nia mate.

Governu, iha Sorumutu Konsellu Ministru Estraordinária, dekreta ona Lutu Nasionál durante loron 3, to’o tuku 6 loraik loron 8 fulan Marsu, no aprezenta nia kondolénsia ba nasaun tomak, liu-liu ba família matebian nian, militante sira Partidu ASDT nian nune’e mós ba populasaun.

Iha loron 6, Francisco Xavier do Amaral nia isin mate, sei tau iha rezidénsia bairru Faról, loron 7 sei tau iha Parlamentu Nasionál no hafoin sei lori ba Salaun Nobre Palásiu Prezidente Repúblika nian. Funerál sei hala’o iha Kinta-feira, loron 8 fulan Marsu, iha Katedrál Díli hafoin hotu-hotu sei akompaña hodi lori nia isin mate to’o ba iha Jardin Erói sira nian, iha Metinaru.



Haree komunikadu ba imprensa, favor ida, hanehan iha ne’e.