Sekretaria Estadu Formasaun Profisionál no Empregu (SEFOPE), iha loron 8 fulan Fevereiru, halo sorumutu jerál ba dahuluk ho administradór distritu sira 13, no reprezentante hosi Obras Públika, Ministériu Administrasaun Estatál no Ordenamentu Territóriu (MAOET), Ministériu Finansa no Polísia Nasionál Timor-Leste (PNTL), hodi ko’alia kona-ba liña koordenasaun ba empregu rurál.

“Objetivu hosi sorumutu interministériál ho administradór distritu 13 sira ne’e, mak, atu kria liña koordenasaun di’ak hodi bele ezekuta orsamentu Estadu nian ne’ebé liga ba implementasaun empregu rurál. Ba administradór distritu sira atu haree didi’ak, estrada rurál ida ne’ebé mak prioridade iha imi-nia distritu. Ekipa téknika SEFOPE sempre hein sujestaun mai hosi adminitradór ka autoridade lokál sira. Tanba realidade imi mak hatene situsaun iha terrenu”, hateten Sekretáriu Estadu Formasaun Profisionál Empregu, Bendito Freitas

Sekretáriu Estadu ne’e mós informa tan katak totál orsamentu ba empregu rurál hamutuk dolár millaun 20, la’ós tenke gasta hotu maibé gasta tuir nesesidade ne’ebé iha.

Iha sorumutu ne’e, Diretór Nasionál Empregu SEFOPE, Paulo Alves informa mós katak, dezde tinan 2009 to’o 2011, Diresaun Nasionál Empregu SEFOPE simu proposta mai hosi komunidade sira iha distritu 13 kona-ba reabilitasaun estrada rurál.