Sorumutu estraordinária Konsellu Ministru loron 16 fulan Fevereiru tinan 2012
IV GOVERNU KONSTITUSIONÁL
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu estraordinária Konsellu Ministru loron 16 fulan Fevereiru tinan 2012
Konsellu Ministru hala’o sorumutu estraordinária iha semana ne’e, kinta-feira,loron 16 fulan Fevereiru 2012, iha Sala Sorumutu Konsellu Ministru, iha Palásiu Governu, iha Díli, no aprova ona:
1. Apoiu Finanseiru ba Kandidatu Prezidénsia Repúblika
Tanba iha nesesidade atu asegura kandidatu hotu ba eleisaun Prezidente Repúblika, iha kondisaun igualdade, mak iha apoiu finanseiru ida mínimu, ne’ebé reprezenta aktu suporte ida husi Estadu ba kada aktu emblemátiku no Demokrasia, Konsellu Ministru konsede, montante osan USD $ 10,000.00 (dólar amerikanu rihun sanulu) ba kandidatu ofisiál idak-idak iha primeira volta ba eleisaun Prezidénsia Repúblika nian, tuir prinsípiu igualdade ba oportunidade no tratamentu.
Iha segunda volta nafatin iha prosesu eleitorál ne’e nian, sei atribuí hikas fali, finansiamentu públiku ida ho montante osan USD $ 10,000.00 (dólar amerikanu rihun sanulu) ba kandidatu rua ne’e idak-idak.
