Sorumutu Konsellu Ministru loron 1 fulan Fevereiru 2012
IV GOVERNU KONSTITUSIONÁL
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu Konsellu Ministru loron 1 fulan Fevereiru 2012
Konsellu Ministru hala’o sorumutu iha kuarta-feira semana ne’e, loron 1 fulan Fevereiru 2012, iha Sala Sorumutu Konsellu Ministru, iha Palásiu Governu, iha Díli, no aprova ona:
1.Rezolusaun Governu ne’ebé forma Grupu Traballu atu tau limite ba Fronteira Marítima Timor-Leste nian
Diploma ida ne’e fó kargu ba Ministériu Negósiu Estranjeiru atu koordena grupu traballu intersetoriál ida no fó ba grupu traballu ne’e ekipamentu tékniku no rekursu sientítifiku ne’ebé mak presiza hodi halo determinasaun ba liña baze Timor-Leste nian, nune’e mós instrumentu jurídiku sira ne’ebé mak presiza hodi halo delimitasaun ba fronteira tasi País ne’e nian.
Dokumentu ida ne’e fó, mós, segimentu ba regra hirak prevee iha Artigu 12° Lei 7/2002, loron 20 Setembru hodi halo remata prosesu internu ratifikasaun nian, no nu’udar depózitu instrumentu nian tuir mai ne’ebé mak korresponde, ba Konvensaun Nasoens Unidas kona-ba Direito Tasi nian, ne’ebé mak adopta iha Montego Bay, loron 10 fulan Dezembru 1982.
2.Dekretu-Lei ne’ebé mak aprova alterasaun dahuluk ba Dekretu-Lei n.° / 7/2008, loron 5 fulan Marsu, ne’ebé aprova Orgánika Sekretaria Estadu Konsellu Ministru
Ho diploma ida ne’e, Sentru Rádiu Komunitária (CRC) tama ona fali ba Administrasaun direta Estadu nian, hamutuk ho Sekretaria Estadu Konsellu Ministru (SECM).
CRC ne’e organizasaun ida ne’ebé responsabiliza ba iha área promosaun no monitorizasaun Rádiu iha nível komunidade, ne’ebé SECM mak halibur fali, tanba ida ne’e kompeténsia Sekretaria Estadu nian ba regulamentasaun polítika komunikasaun sosiál nian.
Ho nune’e, halo fali alterasaun ba orgánika ne’e rasik hodi bele reflete ezisténsia Diresaun Nasionál foun ida ne’e nian.
Konsellu Ministru mós sei análiza:
1.Aprezentasaun Estudu ba atividade Komersiál sira iha Timor-Leste
Ministériu Finansa aprezenta ona ba Konsellu Ministru levantamentu ba dahuluk kona-ba atividade sira komersiál iha Timor-Leste, ne’ebé hala’o iha tinan 2010. Estudu ne’e lista no kategoríza atividade sira komersiál ne’ebé dezenvolve tiha ona iha Timor-Leste, husi setór naun-petrolíferu ekonomía nian, ho informasaun ne’ebé detallada kona-ba estrutura no dezenpeñu setór komersiál nian iha Timor-Leste. Aleinde informasaun ne’e útil ba elaborasaun polítika no dezenvolvimentu setór nian, sei uza informasaun ne’e hodi halo kálkulu ba Produtu Internu Brutu (PIB) nian.
Estudu ne’e Dezenvolve tiha ona husi Diresaun Nasionál ba Estatístika (Diresaun-Jerál nian ba análiza no peskiza Ministériu Finansa nian) ho apoiu husi parseiru dezenvolvimentu.
2.Pontu situasaun kona-ba g7+, no Akordu Foun
Tuir sorumutu sira ne’ebé hala’o iha tinan rua liubá, ne’ebé relasiona ho g7+, no ho aprosimasaun ba eventu grupu sira nian ne’ebé ajenda tiha ona ba tinan ida ne’e iha Díli, Ministériu Finansa aprezenta ona ba Konsellu Ministru atualizasaun ida kona-ba atividade ne’ebé dezenvolve tiha ona husi g7+, no kalendáriu ba eventu sira tuir mai. Ministra Finansa, Emília Pires mak sei preside g7+, ne’ebé konta ho membru nain 19.
