Ministru Negósiu Estranjeiru, Zacarias Albano da Costa, hala’o sorumutu ida iha sesta-feira, loron 27 fulan Janeiru, ho delegasaun Organizasaun Nasoens Unidas (ONU) ne’ebé lidera husi Diretór Departamentu Operasaun no Manutensaun Pás, Divizaun Ázia no Médiu-Oriente nian, Wolfgang Weisbrod-Weber.

Delegasaun ONU nian ne’ebé daudaun ne’e iha Timor-Leste ho objetivu atu halo avaliasaun ida kona-ba situasaun país nian no atu hetan pontudevista kona-ba papél no formatu Misaun Nasoens Unidas nian ne’ebé maka sei substitui UNMIT, iha fulan Janeiru tinan 2013. Delegasaun nia Ajenda, inklui mós sorumutu balu ho Governu, opozisaun, doadór sira no sosiedade sivíl.

Tuir Zacarias da Costa, “sira hakarak hatene ideia Timor-Leste nian relasiona ho períodu pós-UNMIT. Atu dehan de’it katak ita sei iha prezensa ida ne’ebé, politikamente, forte atu dialoga ho Governu ne’ebé bele mobiliza rekursu finanseiru no umanu ba área téknika sira ne’ebé ita presiza liu”.

Iha sorumutu ne’e, ko’alia ba opsaun oioin kona-ba formatu prezensa ONU nian, opsaun sira ne’e mak sei konsta iha relatóriu ida ho ninia sujestaun ida-idak: “Governu tuir mai maka sei halo desizaun. Ha’u bele dehan katak ita hakarak mantein nafatin parseria ho Nasoens Unidas maibé Governu ida ne’e só bele halo rekomendasaun. Mézmuke, ita hakarak Nasoens Unidas kontinua iha ne’e, prezensa ida ne’e labele interfere ho soberania Timor-Leste”, realsa Ministru Negósiu Estranjeiru.