Primeiru-Ministru, hamutuk ho ekipa ida husi  Ministériu Finansa nian, sei análize no balansu ida ba ezekusaun Orsamentu Gerál ba tinan 2011 nian.

Objetivu mak, ho kolaborasaun husi membru governu hotu-hotu, diretór jerál no diretór nasionál sira, halo balansu entre OGE tinan 2011 no implementasaun OGE ba tinan 2012 nian no halibur idea atu hetan dalan ida hodi fó resposta ba dívida Finansa Públika nian relasiona ho tinan ne’ebé liubá ne’e.

Tuir Vise-Ministru Finansa nian, Rui Manuel Hanjam, “maske konta Estadu nian ba tinan 2011,taka tiha ona, maibé sei iha asuntu balu kona-ba finansa Estadu nian ne’ebé presiza trata ho atensaun, seriedade no responsabilidade, atu nune’e tuir regra finansa públika tinan 2011 nian bele taka ona”.

Kay Rala Xanana Gusmão ho ekipa Ministériu Finansa nian sei bá vizita ministériu, ajénsia autónoma no empreza públika sira. Vizita ne’e hahú tiha ona iha loron 16 fulan Janeiru, ho Ministériu Infra-estrutura,  tuir mai ajénsia autónoma sira (SAMES, IGE, APORTIL, RTTL no Aviasaun Sivíl), EDTL no Ministériu Saúde.Tuir mai Ministériu Edukasaun; Agrikultura no Peska; Negósiu Estranjeiru; Administrasaun Estatál no Ordenamentu Territóriu; Defeza no Seguransa; Justisa; Turízmu, Komérsiu no Indústria no Ministériu Ekonomia no Dezenvolvimentu.