Sorumutu Nasionál Ba Dahaat Ba Okupante Kargu Diresaun Sira
Komisaun Funsaun Públika iha loron 16 fulan Dezembru 2011, iha Sentru Konvensaun Díli, organiza sorumutu Nasionál ba dahaat ba okupante kargu diresaun sira ho nia tema “Etika no Profesionalismu iha Funsaun Públika”
Sorumutu ne’e hahú uluk ho palestra ne’ebé aprezenta hosi magnifiku Reitór Universidade Nasionál Timor Lorosa’e, Dr. Aurelio Guterres, ho nia tema, Étika no Profesionalismu iha Funsaun Públiku” hafoin tuir fali, intervensaun hosi Diretór Jerál hosi Ministériu no Sekretaria Estadu sira, hodi aprezenta progresu no dezafiu relasiona ho tema sorumutu nian no ikus liu intrevensaun hosi Provedór Direitu Umanu no Justisa, Sebastião Dias Ximenes
Prezidente Komisaun Funsaun, Públika Libório Pereira, hateten sorumutu ne’ebé ko’alia kona-ba Étika no Profesionalismu iha funsaun públiku nian ne’e, importante tebes atu bele haree nafatin servisu funsionáru públiku nian iha ministériu no sekretaria estadu idaidak entermu jestaun kapasidade no seluk tan. Libório haktuir tan katak, sorumutu ne’e nu’udar oportunidade di’ak ida ba diretór jerál sira, atu aprezenta sira nia progresu no desafiu durante ne’e hasoru ba Primeiru-Ministru.
Primeiru-Ministru, Kay Rala Xanana Gusmão, iha nia intervensaun hateten, “Funsionáriu Públiku sira presiza hatudu étika no profesionalismu ida di’ak bainhira hala’o servisu laos halao servisu konforme hakarak deit, imi nia funsaun mak atu servi ita nia Nasaun, se imi mak gosta kor politika ida, entaun servisu sei la’o, tan husu ba ita boot sira ne’ebé ukupa kargu diresaun nian, atu hala’o servisu ho étika no profesionalismu. Xefe Governu ne’e, hatutan tan katak, “imporrtante liu mak tenke servisu ho nasionalimu no patriotism hodi labele hanoin deit interese individuál no haluha tiha interese nasionál”.
Partisipa iha sorumutu ne’e, alende Primeiru-Ministru no Prezidente Komisaun Públiku, marka prezensa mós membru Governu, Komisáriu sira Komisaun Funsaun Públiku nian, Provedór Direitu Umanu no Justiosa, Sebastião Pereira, magnifiku reitór UNTL, Aurelio Guterres, Reprezentante Sekretáriu Jerál ONU nian iha Timor-Leste, Ameerah Haq, reprezentante Igreja Katolika, Diretór Jerál, Diretór Nasionál no Konvidadu sira seluk.
