Iha loron 9 fulan Janeiru, realiza iha Knowledge Center, Ministeriu Finansas, Sorumutu Komisaun Doasaun Sasan Misaun UNMIT nian ba Timor-Leste. Prezidida hosi Visi-Ministru Finansas no Prezidenti Komisaun Doasaun nian, Rui Manuel Hanjam, sorumutu ne’e tuir perspetiva atu divulga no elusida partisipantis sira konaba estrutura, objetivus no termus referensia Komisaun Doasaun nian, no mos makanismus no prosedimentus nebe’e halo parte ba prosesu doasaun sasan nian.

Konstitui hanesan pontu fokal ba kordenasaun prosesu admnistrativu husi doasaun, Komisaun foin mak estabelese ne’e, nia komporta estrutura interministrial ida, nebe’e integra Diretor-Jeral Sekretaria Estadu Transportes no Komunikasaun, Diretor Nasional Jestaun Patrimoniu Estadu, Diretor Nasional Terra no Propriedade sira husi Ministeriu Justisa, Diretor Lojistika PNTL nian, Diretor Patrimoniu Sekretaria Estadu Defeza no ekipa teknika sira husi PNTL no husi Ministeriu sira nebe’e relevante iha prosesu doasaun, nudar membrus.

Komisaun ne’e tenki asegura katak sasan nebe’e UNMIT fo’o ne’e, se distribui tuir nesesidadi real Ministeriu no Instituisaun ida-idak, no sertifika mos katak sira ne’e iha dunik verbas atu halo manutensaun ho di-diak ba sasan sira nebe’e simu. Liu-liu, partikularmente, se sasan ke refere ne’e mak hanesan kareta sira. Atu viabliza prosesu ida ne’e no atu hases an hosi irregularidadi, Ministeriu sira ka Instituisaun sira tenki halo levantamentu ida ba sira nia nesesidadi sira, halo rekerimentu ida no haruka ba Komisaun Doasaun, nebe’e tuir mai sei lori rekerimentu ne’e ba aprovasaun iha Sorumutu Konsellu Ministru nian. Iha momentu simu, sasan doasaun hotu-hotu sei rejista atu nune’e bele evita ke sasan hirak ne’e monu fali ba ema seluk nia liman atu uza fali ba nia partikular o uza indevidamente. Prezidenti Komisaun klarifika katak Instituisaun sira husi Estadu bele simu sasan nebe’e iha espoliu UNMIT nian, ezemplu hanesan kareta sira no matrial informatik, desde ke sira husu tuir sira nia nesesidadi sira no pedidu ne’e hetan aprovasaun hosi Konsellu Ministru no hosi S. E. Primero-Ministru.

Reuniaun ne’e konta mos ho prezensa hosi Xefi Apoiu ba Misaun UNMIT nian ba Timor-Leste, Señor Amadu Kamara, nebe’e kongratula Konsellu Ministru tamba fo’o inisiativa atu estabelese Komisaun Doasaun no reforsa katak UNMIT hakarak sertifika ke Governu Timor-Leste iha rekursus umanus, orsamentu no planeamentu nebe’e forte atu garante utilizasaun sasan nebe’e sei fo’o.