IV GOVERNU KONSTITUSIONÁL

SEKRETARIA ESTADU KONSELLU MINISTRU

……………………………………………………………………………………………………………………………

KOMUNIKADU IMPRENSA

Sorumutu Konsellu Ministru nian iha loron 4 fulan Janeiru 2012

Konsellu Ministru hala’o  sorumutu iha kuarta-feira semana ne’e, loron 4 fulan Janeiru 2012, iha Sala Sorumutu Konsellu Ministru, iha Palásiu Governu, iha Díli, no halo análize ona ba:

1.Dezempeñu husi ema sira ne’ebé mak iha kargu sira xefia nian

Tuir sorumutu nasionál dahaat nian, ba ema sira ne’ebé iha kargu diresaun, ne’ebé mak halibur Diretór-Jerál sira, Diretór Administrasaun no Finansa no Xefe Departamentu Aprovizionamentu sira, nune’e mós membru Governu sira, iha Sentru Konvensaun Díli, iha loron 16  fulan Dezembru loron hirak ikus nian, hodi diskuti kona-ba étika no profisionalizmu iha Funsaun Públika, Konsellu Ministru rona Xefe Gabinete Ministériu Finansa no Diretór Tesouru atu hodi halo apresiasaun ida detallada kona-ba dezempeñu husi ema sira ne’ebé iha kargu diresaun sira, durante tinan 2011 nian, no hodi  prepara fali servisu ba tinan 2012.

2. Entrega Apoiu Umanitáriu ba Tailándia no Filipina

Konsellu Ministru simu mós, Embaixadora Filipina nian, Maria Aileen H.Bugarin, no Embaixadór Tailándia nian, Suraphan Boonyamanop, hodi hato’o apoiu Timor-Leste nian tanba situasaun ne’ebé nasaun rua ne’e hasoru hanesan inundasaun ne’ebé afeta ema tokon ba tokon no halo estraga sasán barak.

Konsellu Ministru, ho jestu ida fraternidade no solidaridade ba País rua ne’e, entrega ona ba embaixadór ida-idak xeke ida ho valór dolar rihun 750, ho intensaun hodi hamenus difikuldade sira ne’ebé hetan husi dezastre naturál hirak ne’e.