Sekretáriu    Estadu    Juventude   no Desportu, Miguel Manetelo, partisipa iha sorumutu dahuluk   entre Ministru Desportu ASEAN nian ne’ebé hala’o durante loron tolu hahú hosi loron 13 to’o 16 iha  Yogyakarta, Indonézia.

Manetelo esplika katak, asuntu ne’ebé  ko’alia  durante sorumutu alende hametin kooperasaun hodi dezenvolve desportu  iha nasaun ASEAN, sira mós  propoin para oinsá  ASEAN bele sai uma nain ba Copa Mundiál  tinan 2030, ideas  sira ne’ebé mosu iha sorumutu ne’e sei hato’o ba FIFA, nuudar esforsu  ASEAN nian atu organiza kopa mundiál.

Sekretáriu Estadu, Miguel Manetelo, afirma liu tan katak “maske partisipasaun ita-nian  hanesan observadór, maibé sorumutuu ne’e  importante tanba liuhosi ida ne’e sira mós bele hatene katak, ita hakarak duni atu tama  membru ASEAN”.

Sorumutu ne’e partisipa hosi ministru desportu  hosi Nasaun  sanulu hanesan,  Indonézia, Kambodia, Tailándia, Malázia, Vietname, Singapura, Laos, Myanmar, Brunei Darusalám, no Filipina.