Sekretariu Estadu Seguransa (SES) liu hosi Diresaun Nasionál Protesaun Sivil (DNPS), iha tersa-feira, loron, 20 fulan Dezembru 2011, iha edifisiu Diresaun Nasionál Protesaun Sivil, Kaikoli, Díli,  fó Pose ba Segundu Komandante Korpu Bombeirus Distritu Dili, Baukau no Manufahi.

Diretór Nasionál Protesaun Sivil, Domingos Pinto, hateten katak “Serimónia fó pose ida ohin, bazeia ba konkursu ne’ebé maka sira tuir, aumezmu tempu promove sira nia deviza ba bombeirus xefe, tanba sira asume ona komandu, sira nia deviza labele hanesan bombeirus sira seluk”.

Ami hatene katak ami sei iha difikuldades kona-ba ekiparasaun, deviza ka valór sira ne’ebé iha bombeirus ne’e ho nivel salariál  ne’ebé  estabelese hosi funsaun públika, ami haree hela oinsá atu haree estatutu ida ba ita nia bombeirus sira para depois ita deskute internamente iha Sekretaria Estadu Seguransa hafoin ita lori ba deskute ho komisaun funsaun públika para hodi haree estatutu ida ba ita-nia bombeirus sira ne’e, hateten Domingos Pinto

Iha Fatin hanesan Sekretáriu Estadu Seguransa, Francisco Guterres hatuir mós katak “Ohin ita asiste tan prosesu atu priense rekijitu ba iha dezenvolvimentu bombeirus nianian hodi bele responde ba nesesidade ita nia rai nnian, tuir prosesu ne’ebé ita la’o durante ne’e ita tau atensaun barak liu ba bombeirus tanba bombeirus nia servisu liga liu ba iha komunidade atu oinsá bele fó apoiu ba iha komunidade bainhira sira nesesita ho priensementu vaga sira ne’ebé maka iha, bombeirus bele ona dudu Diretór protesaun Sivil atu bele hahú hanoin ona kona-ba dezenvolvimentu protesaun sivil iha Distritu no mós iha Nasionál.

Sekretáriu Estadu mós hatutan  katak, ko’alia kona-ba profesionalizmu ,Ha’u husu ita boot sira kontinua nafatin hala’o servisu, didika aan nafatin ba servisu, tanba ita-boot sira hakarak ka lakohi povu sempre tau ninian esperansa ba ita-boot sira, ha’u husu ita-boot sira hatudu  nafatin  ita-boot sira nia profesionalizmu.